ސަސް އިން މާޒިޔާ ހިފަހައްޓައިފި، ޓީސީ ކުރިއަށް

ދިރާގު ދިވެހި ޕްރިމިއާ ލީގުގައި މިރޭ މާޒިޔާ ސްޕޯޓްސް އެންޑް ރެކްރިއޭޝަނުން ގޯލެއް ޖެހިޔަނުދީ ސުޕަ ޔުނައިޓެޑް ސްޕޯޓްސް (ސަސް) އިން 0-0 އިން މެޗު އެއްވަރުކޮށްފި އެވެ.

އެންމެ ފަހުގެ ލީގު ޗެމްޕިއަން މާޒިޔާ އަތުން ސަސް މިރޭ ހޯދީ މުހިއްމު ޕޮއިންޓެކެވެ. ލީގުގައި މިއަދު ހަވީރު ޓީސީ ސްޕޯޓްސް ކްލަބުން ވަނީ ޔުނައިޓެޑް ވިކްޓްރީ 2-0 އިން ބަލިކޮށްފަ އެވެ. މިއަދުގެ މެޗުތަކަށް ފަހު ލީގުގެ އެއް ވަނައިގައި މާޒިޔާ އޮތީ ކުޅުނު 11 މެޗުން 25 ޕޮއިންޓް ހޯދައިގެންނެވެ. 11 މެޗުން ލިބުނު 12 ޕޮއިންޓާ އެކު ސަސް އޮތީ ލީގުގެ ހަ ވަނައިގަ އެވެ. ހަވީރު މެޗުގެ ނަތީޖާއާ އެކު ޓީސީ ވަނީ ހަތް ވަނަ އިން ފަސް ވަނަ އަށް ކުރިއަށް ޖެހިލާފަ އެވެ. 11 މެޗުން އެޓީމަށް 12 ޕޮއިންޓް ލިބިފައިވާއިރު ހަ ވަނައިގައި އޮތް ކްލަބް އީގަލްސް ވެސް ވަނީ 12 ޕޮއިންޓް ހޯދައިފަ އެވެ. ޓީސީ ފަސް ވަނައިގައި އޮތީ ގޯލުގެ ތަފާތުން ކުރި ލިބޭތީ އެވެ.

Advertisement

މިރޭގެ މެޗަށް ސަސް އިން ނުކުތީ މަދުވެގެން ޕޮއިންޓެއް ހޯދުމަށް އަޒުމު ކަނޑައަޅައިގެންނެވެ. ފުރަތަމަ ޑިވިޝަނުގައި އަލަށް ވާދަކުރަމުން އަންނަ ސަސް އިން މިރޭ ވަނީ މާޒިޔާގެ ވަރުގަދަ އެޓޭކްތައް ހުއްޓުވުމުގައި މޮޅު ކުޅުމެއް ދައްކައިފަ އެވެ. ހާއްސަކޮށް މާޒިޔާގެ ހަމަލާތައް ހުއްޓުވުމުގައި ޑިފެންޑަރުންނާއި ކީޕަރު ވަނީ ރަނގަޅު ކުޅުމެއް ދައްކައިފަ އެވެ. މިރޭގެ މެޗުގެ މޮޅުކުޅުންތެރިޔާގެ މަގާމް ހޯދީ ސަސް އަށް ކުޅޭ ތަޖުރިބާކާރު ޑިފެންޑަރު އަބްދުﷲ ހަނީފް (ބެންޖޯ) އެވެ.

ޓީސީ އާއި ޔުނައިޓެޑް ވިކްޓްރީ ވާދަކުރި މެޗުގެ ތެރެއިން. – ފޮޓޯ: އިބްރާހީމް ފާއިދު / އެފްއޭއެމް

ލީގުގައި މިއަދު ޓީސީ އަތުން ބަލިވި ޔުނައިޓެޑް ވިކްޓްރީ އޮތީ މިހާތަނަށް މެޗަކުން މޮޅެއް ނުލިބި 03 ޕޮއިންޓާ އެކު ލީގުގެ ފުލުގަ އެވެ. މެޗުގައި ޓީސީގެ ދެ ލަނޑު ވެސް ޖެހީ މި ސީޒަނުގައި މޮޅު ކުޅުމެއް ދައްކަމުން އަންނަ މުހައްމަދު އައްޒާމް އެވެ. އައްޒާމްގެ ފުރަތަމަ ލަނޑު 32 ވަނަ މިނެޓުގައި ޕެނަލްޓީއަކުން ޖެހިއިރު ދެ ވަނަ ލަނޑު ޖެހީ ދެ ވަނަ ހާފު ފެށިގެން ފަސް ވަނަ މިނެޓުގަ އެވެ. މެޗުގެ މޮޅު ކުޅުންތެރިޔާގެ މަގާމް ވެސް ހޯދީ އައްޒާމް އެވެ.

ލީގުގައި މާދަމާ ރޭ ކުޅޭ މެޗުގައި ބައްދަލުކުރާނީ ދަ ގްރާންޑޭ ސްޕޯޓްސް ކްލަބާއި ކްލަބް ގްރީން ސްޓްރީޓްސް އެވެ. މި ހަފްތާ ކްލަބް ވެލެންސިއާ އާއި ކްލަބް އީގަލްސް ކުޅުމަށް ހަމަޖެހިފައި އޮތް މެޗު ވަނީ މިމަހުގެ 27 ވަނަ ދުވަހަށް ބަދަލުކޮށްފަ އެވެ. އެ މެޗު ފަސްކުރީ އޭއެފްސީ ކަޕްގެ ކޮލިފައިންގައި ކްލަބް އީގަލްސް މި ހަފްތާ މެޗު ކުޅުމަށް ހަމަޖެހިފައިވާތީ އެވެ.

Advertisement