އެސްޓީއޯ އޭދަފުށި ކަޕް: ފައިނަލުގެ ފުރަތަމަ ޖާގަ ވެލާ ސްޕޯޓްސް އަށް

ބ. އޭދަފުއްޓަށް ހުޅުވާލައިގެން އެރަށު ކައުންސިލްގެ ކްލަބް، ކްލަބް އޭދަފުށިން އިންތިޒާމުކޮށްގެން ކުރިއަށްގެންދާ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އޭދަފުށި ކަޕް ފުޓްބޯޅަ މުބާރާތުގެ ފައިނަލުގެ ފުރަތަމަ ޖާގަ ހުނަރުވެރި ގިނަ ކުޅުންތެރިންތަކެއް ހިމެނޭ ވެލާ ސްޕޯޓްސް ކްލަބުން ހޯދައިފި އެވެ.

އޭދަފުށީ ކަޕްގައި ފަސް ޓީމަކުން ވާދަކުރާއިރު ފައިނަލުގެ ފުރަތަމަ ޖާގަ ލިބެނީ ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ޓީމަކަށެވެ. ވެލާ ސްޕޯޓްސް ފައިނަލުގެ ޖާގަ ކަށަވަރުކުރީ މިއަދު ހަވީރު ބީކޭ ފުޓްބޯޅަ ޓީމާ ވާދަކޮށް 5-1 އިން މޮޅުވެ ހަތަރު މެޗުން 10 ޕޮއިންޓް ހަމަކޮށްގެންނެވެ. އެޓީމަށް ގްރޫޕް ސްޓޭޖުގެ މެޗުތައް ނިމިފައިވާއިރު ތާވަލުގެ ދެ ވަނައިގައި އޮތީ 6 ޕޮއިންޓް ލިބިފައިވާ ހުސް ސޮނގުންނެވެ. ތިން ވަނައިގައި އޮތް އެމްވީ ޔުނައިޓެޑަށް ލިބިފައިވަނީ ހަތަރު ޕޮއިންޓެވެ. ހަތަރު ވަނައިގައި އޭދަފުށީ ވެޓަރަންސް ޓީމު އޮތްއިރު ފުލުގައި އޮތީ މިއަދުގެ މެޗުން ބަލިވި ބީކޭ ފުޓްބޯޅަ ޓީމެވެ. ތިން މެޗު ކުޅުނުއިރު މިއިން ކޮންމެ ޓީމަކަށް ލިބިފައިވަނީ ޕޮއިންޓެކެވެ. ބީކޭ ޓީމު އެކުލަވާލާފައިވަނީ އެރަށުގެ ޒުވާން ގިނަ ކުޅުންތެރިންތަކެއް ހިމަނައިގެންނެވެ.

Advertisement

ވެލާ ސްޕޯޓްސް އާއި ބީކޭ ފުޓްބޯޅަ ޓީމު ވާދަކުރި މެޗުގެ ތެރެއިން. – ފޮޓޯ: އިބްރާހީމް ނަޒީހް، ރަޔާން ފޮޓޯސް

މިއަދުގެ މެޗުގެ ފުރަތަމަ ލަނޑު 17 ވަނަ މިނެޓުގައި ޖެހީ ވެލާ ސްޕޯޓްސްގެ މުހައްމަދު ތަޝްމީން އެވެ. ދެ ވަނަ ލަނޑު އޭގެ ދެ މިނެޓު ފަހުން ހުސައިން ޝަރީފް ޖެހިއިރު ފުރަތަމަ ހާފު ނިމުމުގެ ކުރިން ތިން ވަނަ ލަނޑު ޖެހީ އަބްދުއްސަލާމް ހާމިދު އެވެ. ފުރަތަމަ ހާފުގައި ތިން ގޯލުގެ ލީޑެއް ނެގުމަށް ފަހު ދެ ވަނަ ހާފުގައި ވެލާ ސްޕޯޓްސް އިން ވަނީ އިތުރު ދެ ލަނޑު ޖަހައިފަ އެވެ. މި ލަނޑުތައް ކާމިޔާބުކޮށްދިނީ އިބްރާހީމް ޝަރީފް އާއި އަހުމަދު އަލީ އެވެ. މެޗުގައި ބީކޭގެ ހަމައެކަނި ލަނޑު ކާމިޔާބުކޮށްދިނީ ތޮލްހަތު މުހައްމަދު ވަހީދު އެވެ.

މުބާރާތުގެ ފައިނަލުގެ ދެ ވަނަ ޖާގަ ލިބޭނީ ލީގު ބުރުގެ ކުޅުން ނިމޭއިރު ދެ ވަނަ އަދި ތިން ވަނަ ހޯދާ ދެޓީމުގެ މެދުގައި ކުޅޭ ސެމީ ފައިނަލް މެޗުން މޮޅުވާ ޓީމަކަށެވެ. މުބާރާތުގެ ލީގު ބުރުގައި ބާކީ ދެ މެޗު އޮތްއިރު ސެމީ ފައިނަލް މެޗު ކުޅުމަށް ހަމަޖެހިފައިވަނީ އަންނަ އަންގާރަ ދުވަހު އެވެ. ފައިނަލް މެޗު ކުޅެން ޝެޑިއުލްކޮށްފައިވަނީ އަންނަ ހުކުރު ދުވަހު އެވެ.

ކްލަބް އޭދަފުށިން ވަނީ ފިރިހެން ފުޓްބޯޅަ މުބާރާތެއްގެ އިތުރުން ވިމެންސް ފުޓްސަލް މުބާރާތެއް ވެސް ބާއްވަން ނިންމައިފަ އެވެ. އެ މުބާރާތް ފެށުމަށް ހަމަޖެހިފައިވަނީ މިރެ އެވެ. މި މުބާރާތްތަކުގެ މެއިން ސްޕޮންސަރަކީ އެސްޓީއޯ އެވެ. މީޑިއާ ޕާޓްނަރަކީ ފަހުމިނެޓް އެވެ. ފޮޓޯ ޕާޓްނަރަކީ އޭދަފުށީ ރަޔާން ފޮޓޯސް އެވެ.

Advertisement