ޓީސީ ބަލިކޮށް ވެލެންސިއާ އަލުން ފޯމަށް

ދިރާގު ދިވެހި ޕްރިމިއާ ލީގުގައި މިއަދު ހަވީރު ކްލަބް ވެލެންސިއާ އިން ޓީސީ ސްޕޯޓްސް ކްލަބާ ދެކޮޅަށް ކުޅުނު މެޗު 2-0 އިން ކާމިޔާބުކޮށްފި އެވެ.

މިއީ ލީގުގައި އެންމެ ފަހުން ކުޅުނު ފަސް މެޗުގެ ތެރެއިން ވެލެންސިއާ އަށް މޮޅެއް ލިބުނު ފުރަތަމަ މެޗެވެ. މިއަދުގެ ކުރިން ލީގުގައި ވެލެންސިއާއިން ކުޅުނު ހަތަރު މެޗުގެ ތެރެއިން ދެ މެޗުން ބަލިވިއިރު އަނެއް ދެމެޗުން ވީ އެއްވަރެވެ. މިއަދުގެ މެޗަކީ ޓީސީގެ ކޯޗުކަމާ އަލުން ހަވާލުވުމަށް ފަހު މުހައްމަދު ނިޒާމް (ނިޒާމްބެ) ގެ އިރުޝާދުގެ ދަށުން އެޓީމު ކުޅުނު ފުރަތަމަ މެޗެވެ. ނިޒާމްބެ ޓީސީ ދޫކޮށްލީ 2018 ވަނަ އަހަރު ދިވެހި ޕްރިމިއާ ލީގުގެ ޗެމްޕިއަންކަން ޓީސީ އަށް ހޯދައިދިނުމަށް ފަހު އެވެ.

Club Valencia register their first win in last 5 games!
TC Sports Club are yet to win a game in the second round! pic.twitter.com/ylYsd3vN5c

— Fahuminet (@fahuminet) February 2, 2021

މޮޅާ އެކު ވެލެންސިއާ ވަނީ 15 ޕޮއިންޓް ހަމަކޮށް އަލުން ލީގުގެ ދެ ވަނަ އަށް އަރައިފަ އެވެ. ވެލެންސިއާގެ ފަހަތުން ހަމަ އެ އަދަދަށް ޕޮއިންޓް ހޯދައިގެން ދެ ވަނައިގައި އޮތީ ދަ ގްރާންޑޭ ސްޕޯޓްސް ކްލަބެވެ. ވެލެންސިއާ ކުރީގައި އޮތީ ފައިދާ ގޯލުގެ ތަފާތުން ކުރި ލިބޭތީ އެވެ. މިރޭ މާޒިޔާއާ ދެކޮޅަށް ކުޅޭ މެޗުން ޕޮއިންޓެއް ހޯދައިގެން ވެސް ދަ ގްރާންޑޭ އަށް އަލުން ލީގުގެ އެއް ވަނަ އަށް އެރޭނެ އެވެ. މެޗުން ބަލިވި ޓީސީ އޮތީ ނުވަ ޕޮއިންޓާ އެކު ލީގުގެ ފަސް ވަނައިގަ އެވެ.

މިއަދުގެ މެޗުގެ ފުރަތަމަ ހާފު ނިމުނީ ގޯލެއް ނުޖެހި އެވެ. ފުރަތަމަ ހާފާ ހިލާފަށް ދެ ވަނަ ހާފުގައި ދެޓީމަށް ވެސް ގޯލުޖަހާނެ ފުރުސަތުތައް ލިބުނެވެ. ހާއްސަކޮށް ވެލެންސިއާ އިން ވަނީ މި ހާފުގައި ގިނަ ހަމަލާތަކެއް ޓީސީގެ ގޯލަށް ފޮނުވާލައިފަ އެވެ. ޓީސީން މެޗުގައި އެންމެ ނުރައްކާތެރި ހަމަލާ އުފެއްދީ ދެ ވަނަ ހާފު ފެށިގެން ފުރަތަމަ މިނެޓުގައި މެލްކޮމް ކަސިއުސް ސްޓެވާޓް އެވެ. އޭރިޔާ ތެރެއަށް ވަނުމަށް ފަހު މެލްކޮމް ފޮނުވާލި ބާރު ބޯޅަ އަމާޒުވީ ގޯކުގެ އަރިމަތީ ދަނޑިއަށެވެ.

ވެލެންސިއާގެ ފުރަތަމަ ގޯލު 57 ވަނަ މިނެޓުގައި ޖެހީ އަލީ ފާސިރު (ސެންޓޭ) އެވެ. އޭރިޔާ ބޭރުން ލިބުނު ބޯޅަ ސެންޓޭ އަމާޒުކޮށްލީ ގޯލުގެ މަތީ ކަނަށެވެ. މިއީ ސީޒަނުގައި ފެނުނު އެންމެ ރީތި ގޯލުތަކުގެ ތެރެއިން އެއް ގޯލެވެ. ލީޑު ނެގިތާ އިރުކޮޅެއް ފަހުން ވެލެންސިއާގެ ސޮލާ މުލެޓް އެންޓޯނިއޯ ފޮނުވާލި ބޯޅައެއް ގޯލުގެ އަރިމަތީ ދަނޑިއަށް އަމާޒުވިއިރު ޑިފެންޑަރު ހޯސޭ އެންޓޯނިއޯ ފޮނުވާލި ބޯޅަ ޖެހުނީ ހުރަސް ދަނޑީގަ އެވެ. އަދި ސެންޓޭ އަށް ލިބުނު ހުސް ފުރުސަތެއްގައި ފޮނުވާލި ބޯޅަ ޓީސީގެ ކީޕަރު އަޒަދް މަމަދޯވް ވަނީ ފައިން މަތަކޮށްފަ އެވެ. ވެލެންސިއާގެ ދެ ވަނަ ލަނޑު މެޗު ނިމެން ފަސް މިނެޓަށް ވެފައިވަނިކޮށް ކާމިޔާބުކޮށްދިނީ އަހުމަދު އިމާޒް (އާއްކޮ) އެވެ. އޭރިޔާ ތެރެއިން އާއްކޮ ފޮނުވާލި ބޯޅަ ގޯލަށް ވަނީ ޓީސީގެ ކުޅުންތެރިއެއް ގައިގައި ޖެހިފައި މިސްރާބު ބަދަލުވެގެންނެވެ.

މުހިއްމު މޮޅެއް ހޯދިނަމަވެސް ވެލެންސިއާ އަށް މިއަދު ކުރިމަތިވި މައްސަލައަކީ ކެޕްޓަން އަލީ އަޝްފާގް (ދަގަނޑޭ) އަށް އަނިޔާވެ ބަދަލުކުރަން ޖެހުމެވެ. ޓީސީގެ ކީޕަރާ އެކު ބޯޅަ ހޯދަން އެރިވަގުތު ދަގަނޑޭ އަށް އަނިޔާވެގެން ބޭލީ 67 ވަނަ މިނެޓުގަ އެވެ. މިއަދުގެ މެޗުގެ މޮޅު ކުޅުންތެރިޔާގެ މަގާމް ހޯދީ ސެންޓޭ އެވެ.

މާޒިޔާ އާއި ދަ ގްރާންޑޭ ވާދަކުރާ މެޗު ފަށާނީ މިރޭ ނުވައެއް ޖަހާއިރު އެވެ.