ވަރުގަދަ ސްކޮޑަކާ އެކު ބުރު ސްޕޯޓްސް އިން ސީދާ ތަށްޓަށް

ފުޓްސަލްގެ ގިނަ ތަރިންގެ އިތުރުން ބިދޭސީ ކުޅުންތެރިންނާއެކު މިއަހަރުގެ ތިންވަނަ ޑިވިޝަން ފުޓުބޯޅަ މުބާރާތުގައި ވާދަކުރާ ބުރު ސްޕޯޓްސް ކުލަބުގެ އަމާޒަކީ ސީދާ ތަށި ކަމަށް އެކުލަބުން ބުނެފި އެވެ.

ތަށްޓަށް އަމާޒް ހިފައިގެން ނުކުންނަ ބުރު ސްޕޯޓްސް ކުލަބަށް މިއަހަރު އިރުޝާދު ދޭނީ ދިވެހި ޕްރިމިއަރ ލީގުގައި ވާދަކުރާ ކުލަބް އީގަލްސްގެ އެސިސްޓެންޓް ކޯޗު އަހުމަދު ނިމާދު (ނިމާ) އެވެ. ސީޒަނުގެ ކުރީކޮޅު އީގަލްސްގެ ކޯޗުގެ މަގާމުގައި ހުރި މުހައްމަދު ސިޔާޒް (މޯހަން) ގެ އެއްބަސްވުން އުވާލުމާ ގުޅިގެން ނިމާ ވަނީ ދިވެހި ޕްރިމިއަރ ލީގުގައި މާޒިޔާ އަދި ޔުނައިޓެޑް ވިކްޓަރީއާ ދެކޮޅަށް އީގަލްސް ގޮވައިގެން ނުކުމެ، އެންމެ އިސްކޮށް ހުރެ ޓީމަށް އިރުޝާދުދީ، ރަގަޅު ނަތީޖާތަކެއް ހޯދާފަ އެވެ.

Advertisement

ބުރު ސްޕޯޓްސްގެ ފަރިތަކުރުންތަކުގެ ތެރެއިން ކޯޗު ނިމާ ކުޅުންތެރިންނަށް އިރުޝާދު ދެނީ. – ފޮޓޯ: ބުރު ސްޕޯޓްސް ކްލަބް

ބުރު ސްޕޯޓްސް ކުލަބުން ވަނީ މިއަހަރުގެ ތިންވަނަ ޑިވިޝަނަށް ބިދޭސީ ކުޅުންތެރިންގެ ގޮތުގައި ޔޫކްރޭންގެ ތިން ކުޅުންތެރިން ވެސް ގެނެސްފަ އެވެ. އެއީ ޑިފެންޑަރ ރޯމަން ކުޑްޗެންކޯ އާއި ފޯވަޑް ޕެޓްރޯވް ވަޑީމް އަދި ސޮބޮލް އިލިއާ އެވެ. އިލިއާ އަކީ މީގެ ކުރިން ރާއްޖޭގެ ފުރަތަމަ ޑިވިޝަނުގައި ކުލަބް ގްރީން ސްޓްރީޓްސް އަށް ކުޅުނު މިޑްފީލްޑަރެކެވެ. ބިދޭސީ ކުޅުންތެރިން މިމަހުގެ 24 ވަނަ ދުވަހު ރާއްޖެ އައިސް، ޓީމާއެކު ފަރިތަކުރުންތަކުގައި ބައިވެރިވާން ފަށާފައި ވީނަމަވެސް، މިކުޅުންތެރިންގެ ސޮއިކުރުން ކުރިޔަށް ދިޔައީ މިއަދު ހަވީރު ޑި ޕަބްލިކް ރެސްޓޯރަންޓްގަ އެވެ.

މިމަހުގެ ފަސްވަނަ ދުވަހު ކޯޗް ނިމާ ބުރު ސްޕޯޓްސް ކުލަބާ ހަވާލުވެފައިވާއިރު، ޖެހިގެން އައި ދުވަހުން ފެށިގެން ބުރު ސްޕޯޓްސް އިން ވަނީ މުބާރާތަށް ފަރިތަކުރުންތައް ފަށައިފަ އެވެ. މަޝްހޫރު ގިނަ ފުޓްސަލް ކުޅުންތެރިނާއެކު އެ ޓީމުން ފަރިތަކުރުންތައް ކުރިއަށްގެންދާއިރު އޭގެ ތެރޭގައި އިބްރާހީމް މުބީން (މުއްކި)، ހުސައިން ޝަރީފް (އޮންލީ)، އަބްދުﷲ ޝާފިއު (ޝާއްޕެ)، ޔާމީން މުހައްމަދު (ޔާންޓޭ)، މުހައްމަދު ތަސްމީން (ތައްތި) އަދި ހުސައިން ނާޝިދު (ނާއްޓޯ) ހިމެނެއެވެ. މުއްކި އާއި ތައްތި އަދި އޮންލީ އަކީ މީގެ ކުރިން ފުރަތަމަ ޑިވިޝަނުގެ ތަޖުރިބާ ހުރި ކުޅުންތެރިންނެވެ.

ބުރުން ވަނީ ޖެނުއަރީ ހަވަނަ ދުވަހު ޓީމުގެ ފަރިތަކުރުންތައް ފަށާފައި. – ފޮޓޯ: ބުރު ސްޕޯޓްސް ކްލަބް

ފާއިތުވި ދެ މުބާރާތުގައި ވެސް ބުރު ސްޕޯޓްސް ކުލަބަށް މުބާރާތާ އަލްވަދާއު ކިޔަން ޖެހުނީ ސެމީ ފައިނަލުގައި ޕެނަލްޓީ ޖަހައިގެން ބަލިވުމުންނެވެ. 2017 ވަނަ އަހަރު އެ މުބާރާތުގެ ދެވަނަ ހޯދި ސީލައިފް އަތުން ބަލިވިއިރު، 2018 ވަނަ އަހަރު ބަލިވީ އެފަހަރުގެ ޗެމްޕިއަން ރޮކް ސްޓްރީޓް ސްޕޯޓްސް ކްލަބު އަތުންނެވެ.

ފަނަރަ ޓީމާއެކު ފެބްރުއަރީ މަހު ފަށާ ތިންވަނަ ޑިވިޝަން ފުޓުބޯޅަ މުބާރާތުގައި ބުރު ސްޕޯޓްސް ކުލަބް ހިމެނެނީ ސްޕޯޓްސް ކުލަބް ހޮސްކޯވޯ އާއި ލިޓްލް ޓައުން (އެލްޓީ) ސްޕޯޓްސް ކުލަބުގެ އިތުރުން ލައިނޭޖް ސްޕޯޓްސް ކުލަބާ އެކު ގުރޫޕް ސީ ގައެވެ.

މިއީ ބުރު ސްޕޯޓްސް ކުލަބުން ތިންވަނަ ޑިވިޝަނުގައި ވާދަކުރާ 11 ވަނަ އަހަރެވެ.

Advertisement