އިހަވަންދޫ އާއި މަނަދޫގައި ވެސް ޓާފް ދަނޑު އަޅަނީ

ސަރުކާރުން ރާއްޖޭގެ ރަށްތަކުގައި އަޅާ ޓާފް ފުޓްބޯޅަ ދަނޑުތަކުގެ ތެރެއިން ހއ. އިހަވަންދޫ އާއި ނ. މަނަދޫގެ ފުޓްބޯޅަ ދަނޑުގެ ސަސް ބޭސް ތައްޔާރުކުރުމުގެ މަސައްކަތް އާރުކޭއެލް ގްރޫޕް ޕްރައިވެޓް ލިމިޓެޑާ ހަވާލުކޮށްފި އެވެ.

މި ދެރަށުގެ ފުޓްބޯޅަ ދަނޑުގެ ސަބް ބޭސް ތައްޔާރުކުރުމަށް އެ ކުންފުންޏާ މަސައްކަތް ހަވާލުކުރީ މިއަދު މެންދުރު ފަހު ޔޫތު އެންޑް ސްޕޯޓްސް މިނިސްޓްރީގައި އޮތް ސޮއިކުރުމުގެ ރަސްމިއްޔާތުގަ އެވެ. ޔޫތު މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ ޑެޕިއުޓީ މިނިސްޓަރު އަހުމަދު އިބްރާހީމް އެވެ. އާރުކޭއެލްގެ ފަރާތުން ސޮއިކުރެއްވީ މެނޭޖިން ޑިރެކްޓަރު ހުޒައިމާ އާސިރު އެވެ.

Advertisement

އިހަވަންދޫގެ ދަނޑުގެ ސަބް ބޭސް މަސައްކަތަށް ދެ މިލިއަން ތިން ލައްކަ ރުފިޔާ ހަރަދުވާއިރު މަނަދޫގެ ސަބް ބޭސް މަސައްކަތަށް ދެ މިލިއަން ދެ ލައްކަ ރުފިޔާ ހަރަދުވާނެކަމަށް ޔޫތު މިނިސްޓްރީން ބުނެ އެވެ. އެ މިނިސްޓްރީން މިއަދު ބުނީ މަސައްކަތުގެ ސައިޓް ހަވާލުކުރާތާ 14 ދުވަހުގެ ތެރޭގައި މަސައްކަތް ފެށުމަށް ފަހު 50 ދުވަހުގެ ތެރޭގައި މަސައްކަތް ނިންމަން ޖެހޭނެ ކަމަށެވެ.

ސަރުކާރުން މިހާތަނަށް ވަނީ ފަސް ރަށެއްގެ ފުޓްބޯޅަ ދަނޑުގެ މަސައްކަތް އެއްކޮށް ނިންމާލައިފަ އެވެ. އެއީ ނ. ހޮޅުދޫ، ނ. ކެނދިކުޅުދޫ، ތ. ވިލުފުށި އަދި ފ. ނިލަންދޫ އަދި ރ. އަލިފުށީ ފުޓްބޯޅަ ދަނޑެވެ. ސަރުކާރުން މިހާރު އަންނަނީ ގިނަ ދަނޑުތަކެއް މަސައްކަތް ކުރަމުންނެވެ. މީގެ ތެރޭގައި ޏ. ފުވައްމުލަކާއި ލ. ގަން އަދި ސ. ފޭދޫގައި އަޅާ ޓާފް ދަނޑުގެ މަސައްކަތުގެ ބޮޑު ބައެއް ވަނީ ނިންމާލައިފަ އެވެ.

ކުޅިވަރުގެ ތަރައްގީއަށް ޔޫތު މިނިސްޓްރީން ގިނަ މަސައްކަތްތަކެއް ކުރަމުން އަންނައިރު މިދިޔަ މަހުގެ ފަހުކޮޅު އެ މިނިސްޓްރީން ވަނީ އިތުރު 22 ރަށެއްގެ ދަނޑުގައި ޓާފް އެޅުމުގެ އެއްބަސްވުމުގައި ސޮއިކޮށްފަ އެވެ. މި ދަނޑުތަކުގެ ތެރެއިން 13 ރަށެއްގެ ދަނޑުގައި ޓާފް އެޅުމުގެ މަސައްކަތް ހަވާލުކޮށްފައިވަނީ ވީއޭއެމް ކޮމްޕެނީ ޕްރައިވެޓް ލިމިޓެޑާ އެވެ. މި 13 ރަށް ވަނީ ފަސް ސަރަހައްދަކަށް ބަހާލާފަ އެވެ. ފުރަތަމަ ސަރަހައްދުގައި ހިމެނެނީ ށ. ފުނަދޫ އާއި ށ. ފޯކައިދޫ އަދި ށ. މިލަންދޫ އެވެ. ދެވަނަ ސަރަހައްދުގައި ހިމެނެނީ ނ. ކުޑަފަރި އަދި ނ. ވެލިދޫ އެވެ. ތިންވަނަ ސަރަހައްދުގައި ޅ. އޮޅުވެލިފުށްޓާއި ރ، ދުވާފަރު އަދި ރ. މާކުރަތު ހިމެނޭއިރު، ހަތަރުވަނަ ސަރަހައްދުގައި ހިމެނެނީ ކ. ގުޅި، ކ. ގުރައިދޫ އަދި ކ. މާފުށްޓެވެ.

ފަހުން ހަވާލުކުރި ނުވަ ދަނޑުގައި ޓާފް އެޅުމުގެ މަސައްކަތް ކުރާނީ މެލޭޝިއާގެ ވެލޯސިޓީ ސްޕޯޓްސް އިކުއިޕްމަންޓް ޕްރައިވެޓް ލިމިޓުންނެވެ. އެ ކުންފުނިން ޓާފް އަޅާނީ ހއ. ހޯރަފުށި، ހއ. އިހަވަންދޫ، ހދ. ނޮޅިވަރަމް، ހދ. ހަނިމާދޫ، ހދ. ކުޅުދުއްފުށި، މ. ދިއްގަރު، ދ. ކުޑަހުވަދޫ، ތ. ތިމަރަފުށި އަދި އައްޑޫ ސިޓީގެ ރަށެއްގެ ދަނޑެއްގަ އެވެ. އައްޑޫ ސިޓީ އިން ޓާފް އަޅާނެ ރަށެއް ކަނޑައެޅިގެންދާނީ ޓެންޑަރ ބޯޑާ މަޝްވަރާ ކުރެއްވުމަށް ފަހު ކަމަށް މިނިސްޓަރ މަޙުލޫފް މީގެ ކުރިން ވަނީ ވިދާޅުވެފަ އެވެ.

ޓާފް ދަނޑުތައް ތަރައްގީ ކުރުމުގެ މަސައްކަތް ސަރުކާރުން ކުރަމުން ގެންދާއިރު އަތޮޅުތެރޭގައި 20 ފުޓުބޯޅަ ދަނޑެއް އެޅުމަށް ރާއްޖޭގެ ފުޓުބޯޅައިގެ މައި އިދާރާ އެފްއޭއެމުން ވެސް ދަނީ މަސައްކަތް ކުރަމުންނެވެ. އެފްއޭއެމްގެ މި ޕްރޮޖެކްޓުގެ ދަށުން ކޮރެއާގެ ސަކައިވިންގް ގްލޯބަލް އާއެކު މިދިޔަ އަހަރު ވަނީ އެއްބަސްވުމަކަށް އައިސްފަ އެވެ. ފުޓުބޯޅަ ދަނޑުތައް ތަރައްގީ ކުރުމަށް ފަހު ސަރުކާރާއި އެފްއޭއެމްގެ އަމާޒަކީ މިހާރު ފޯރި ކެނޑިފައިވާ ރާއްޖޭގެ ފުރަތަމަ ޑިވިޝަން ފުޓުބޯޅަ މުޅި ރާއްޖެއަށް ފުޅާ ކުރުމެވެ.

Advertisement