އެންމެ މޮޅު މީހާ އަތުން ވެސް ޕެނަލްޓީ މިސް ވެދާނެ: ބޮނޫޗީ

އިޓާލިއަން ކަޕްގެ ސެމީ ފައިނަލުގައި ރޭ ޔުވެންޓަސްގެ ކްރިސްޓިއާނޯ ރޮނާލްޑޯ އަތުން ޕެނަލްޓީ ބޭކާރުވުމުން، އެއީ “އެންމެ މޮޅު މީހާ އަތުން ވެސް ވެދާނެ ކަމެއް” ކަމަށް ބުނެ އެޓީމުގެ ޑިފެންޑަރު ލިއޮނާޑޯ ބޮނޫޗީ، ރޮނާލްޑޯ ދިފާއުކޮށްފި އެވެ.

އޭސީ މިލާނާ ދެކޮޅަށް ރޭ ޔުވެންޓަސްގެ އަމިއްލަ ދަނޑުގައި ކުޅުނު މެޗު 0-0 އިން އެއްވަރުވި ނަމަވެސް ދެ ލެގުގެ އެގްރިގޭޓުން ކުރި ހޯދައި ޔުވެންޓަސް ވަނީ އިޓާލިއަން ކަޕްގެ ފައިނަލުގެ ފުރަތަމަ ޖާގަ ކަށަވަރުކޮށްފަ އެވެ. މި ދެޓީމު ފެބްރުއަރީ މަހު މިލާންގެ ދަނޑުގައި ކުޅުނު ފުރަތަމަ ލެގްގެ މެޗު ނިމުނީ 1-1 އިން އެއްވަރުވެގެންނެވެ. އެ މެޗު ޔުވެންޓަސް އަށް އެއްވަރުކޮށްދިން ގޯލު މެޗުގެ ފަހު ވަގުތުގައި ލިބުނު ޕެނަލްޓީއަކުން ޖެހީ ރޮނާލްޑޯ އެވެ. އެކަމަކު ރޭގެ މެޗުގެ 16 ވަނަ މިނެޓުގައި ރޮނާލްޑޯ ފޮނުވާލި ޕެނަލްޓީ ޖެހުނީ ގޯލުގެ އަރިމަތީ ދަނޑީގަ އެވެ.

Advertisement

“އެންމެ މޮޅު މީހާ އަތުން ވެސް ޕެނަލްޓީ މިސް ވެދާނެ. އަހަރެމެންނަށް ކްރިސްޓިއާނޯ (ރޮނާލްޑޯ) އަބަދުވެސް މުހިއްމު” މި ސީޒަނުގައި ޔުވެންޓަސް އަށް 25 ގޯލު ޖަހައިދީފައިވާ ރޮނާލްޑޯ ދިފާއުކުރަމުން މެޗަށް ފަހު ބޮނޫޗީ ބުންޏެވެ.

ރޭގެ ޕެނަލްޓީ އަކީ ޔުވެންޓަސް އަށް ބަދަލުވި ފަހުން ރޮނާލްޑޯ އަށް ވައްދާނުލެވުނު ދެ ވަނަ ޕެނަލްޓީ އެވެ. ރޮނާލްޑޯ އަތުން އެންމެ ފުރަތަމަ ޕެނަލްޓީ ބޭކާރުވީ މިދިޔަ އަހަރުގެ ޖެނުއަރީ މަހު ޗިއޭވޯއާ ދެކޮޅަށް ކުޅުނު މެޗުގަ އެވެ.

ރޭގެ މެޗުގައި ޔުވެންޓަސް އިން މޮޅަށް ކުޅުނު ނަމަވެސް އެޓީމަށް ދިމާވީ ނިންމާލުމުގެ މައްސަލަ އެވެ. އަދި، ޔުވެންޓަސްގެ ހަމަލާތައް ހުއްޓުވުމުގައި މިލާންގެ ޒުވާން ގޯލްކީޕަރު ގިއަންލުއިޖީ ޑޮނަރުއްމާ ވަނީ މޮޅު ކުޅުމެއް ދައްކައިފަ އެވެ. ބޮނޫޗީ ބުނީ ރޭގެ މެޗުގައި ގޯލު ނުޖެހުނު ނަމަވެސް ރޮނާލްޑޯއާ އެކު އެޓީމުގެ އަސްލު ފެންވަރުގައި އަދި ފެންނާނެ ކަމަށެވެ.

“އިދިކޮޅު ޓީމުގެ ޑިފެންޑަރުންނަށް ރޮނާލްޑޯގެ ސަބަބުން ޕްރެޝަރު ވޭ. ގޯލު ޖެހުމުގަ ރޮނާލްޑޯ މިއަދު (ރޭ) ނަސީބު ދެރައީ އަދި މިލާންގެ ކީޕަރުގެ ކުޅުން ވެސް މޮޅީ” ތަޖުރިބާކާރު ޑިފެންޑަރު ބުންޏެވެ.

ފައިނަލުގައި ޔުވެންޓަސް ނުކުންނާނީ މިރޭ ކުޅޭ ދެ ވަނަ ސެމީން ކުރި ހޯދާ ޓީމަކާ ދެކޮޅަށެވެ. ނަޕޯލީ އާއި އިންޓަ މިލާން މިރޭ ކުޅޭއިރު މި ދެޓީމުގެ ފުރަތަމަ ލެގް ނަޕޯލީން ކާމިޔާބުކުރީ 1-0 އިންނެވެ. ފައިނަލުގެ ދެ ވަނަ ޖާގަ ލިބޭ ޓީމުން ޔުވެންޓަސްއާ ދެކޮޅަށް ފައިނަލުގައި ނުކުންނާނީ އަންނަ ބުދަ ދުވަހު އެވެ.

އިޓާލިއަން ކަޕަށް ފަހު އިޓާލިއަން ލީގުގެ ކުޅުން އަލުން ފެށުމަށް ހަމަޖެހިފައިވަނީ މި މަހުގެ 20 ވަނަ ދުވަހު އެވެ. ކޮވިޑް-19 އަށް މެދުކަނޑާލުމަށް ފަހު ފަށާ ލީގުގައި ޔުވެންޓަސް ކުޅޭ ފުރަތަމަ މެޗުގައި ޖޫން 22 ވަނަ ދުވަހު ނުކުންނާނީ ބޮލޯނިއާއާ ދެކޮޅަށެވެ. ލީގުގެ ކުޅުން މެދުކަނޑާލިއިރު ޕޮއިންޓެއްގެ ލީޑުން އެއް ވަނައިގައި އޮތީ ޔުވެންޓަސް އެވެ. ދެ ވަނައިގައި އޮތީ ލާޒިއޯ އެވެ.

Advertisement