ބެލޮންޑިއޯ ނުލިބިގެން ލޮލަށް ނިދި ނާންނަ ވަރެއް އަދި ނުވޭ: އެމްބާޕޭ

ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް ބޭނުންވާ ކަމަށާއި، އެކަމަކު އެ ޝަރަފް ހޯދަން އަވަސް އަރުވާލައިގެން އުޅުމުގެ ވިސްނުމެއް ނެތްކަމަށް ފްރާންސާއި ޕީއެސްޖީގެ ހުނަރުވެރި ފޯވާޑް ކިލިއަން އެމްބާޕޭ ބުނެފި އެވެ.

21 އަހަރުގެ އެމްބާޕޭ އަކީ މިވަގުތު ދުނިޔޭގައި ހުރި އެންމެ މޮޅު ކުޅުންތެރިންގެ ލިސްޓުގައި ގިނަ ބަޔަކު ހިމަނާ ކުޅުންތެރިއެކެވެ. އަދި، ކްރިސްޓިއާނޯ ރޮނާލްޑޯ އާއި ލިއޮނަލް މެސީގެ ކާމިޔާބު ދުވަސްވަރަށް ފަހު ބެލޮންޑިއޯ އެވޯޑް ހޯދުމުގެ ފުރުސަތު އެންމެ ބޮޑު އެއް ކުޅުންތެރިއަކީ ވެސް އެމްބާޕޭ ކަމަށް ގިނަބަޔަކު ގަބޫލުކުރެ އެވެ.

މިދިޔަ 12 އަހަރުގެ ތެރެއިން 11 ފަހަރު ބެލޮންޑިއޯ ހޯދާފައިވަނީ ރޮނާލްޑޯ އާއި މެސީ އެވެ. މެސީ ހަ ފަހަރު އެވޯޑް ހޯދިއިރު ރޮނާލްޑޯ ވަނީ ފަސް ފަހަރު ބެލޮންޑިއޯ ހޯދައިފަ އެވެ. 2018 ވަނަ އަހަރުގެ ބެލޮންޑިއޯ ހޯދީ އެ އަހަރުގެ ވޯލްޑް ކަޕްގެ ފައިނަލުގައި ކުޅުނު ކްރޮއޭޝިއާގެ ލޫކާ މޮޑްރިޗެވެ.

އެމްބާޕޭ ބުނީ ބެލޮންޑިއޯ އެވޯޑަށް އޭނާ ވަރަށް ގަޔާވާ ކަމަށާއި، އެކަމަކު އެ ޝަރަފް ހޯދަން އަވަސް އަރުވާލައިގެން އޭނާ ނޫޅޭނެ ކަމަށެވެ.

“ބެލޮންޑިއޯ ލިބުމަކީ ލިބޭ ރީތި ނަމަކަށް ވާނެ. އެކަމަކު އެ އެވޯޑް ނުލިބިގެން އަދި އަހަރެންގެ ލޮލަށް ނިދި ނާންނަ ވަރެއް ނުވޭ” އެމްބާޕޭ ބުންޏެވެ.

ޒުވާން އުމުރުގައި އެމްބާޕޭ ވަނީ ފްރެންޗް ލީގުގެ ޗެމްޕިއަންކަން ހަތަރު ފަހަރު ހޯދައި 2018 ވަނަ އަހަރު ފްރާންސާއެކު ވޯލްޑް ކަޕް ފުޓްބޯޅަ މުބާރާތް ކާމިޔާބުކޮށްފަ އެވެ. ވޯލްޑް ކަޕްގައި އެމްބާޕޭ ވަނީ އެންމެ މޮޅު ޒުވާން ކުޅުންތެރިޔާގެ މަގާމް ހޯދުމުގެ އިތުރުން އެ މުބާރާތުގެ ޑްރީމް ޓީމުގައި ހިމެނިފަ އެވެ. ފްރާންސުން ދުނިޔޭގެ ޗެމްޕިއަންކަން ހޯދިއިރު އެމްބާޕޭގެ ފަރާތުން ތަފާތު މޮޅު ކުޅުމެއް ފެނުނުއިރު މުބާރާތުގައި ވަނީ ހަތަރު ގޯލު ޖަހައިފަ އެވެ.

“އަހަރެންނަކަށް ހިއެއް ނުވޭ އަންނަ ސީޒަނުގަ ނުވަތަ އެއާ ޖެހިގެން އަންނަ ސީޒަނުގަ ވެސް އަހަރެން ބެލޮންޑިއޯ ހޯދަން ޖެހޭ ހެނެއް. އެ އެވޯޑް ހޯދާކަށެއް އަދި އަހަރެން ވަކި ވަގުތެއް ކަނޑައެއް ނާޅަން” ފްރާންސްގެ މޮނާކޯ އިން ވިދާލި ހުނަރުވެރި ކުޅުންތެރިޔާ ބުންޏެވެ.

“އަހަރެން އަބަދުވެސް އިސްކަން ދޭނީ ޕީއެސްޖީ އަށާއި ގައުމީ ޓީމަށް، އަހަރެން ދައްކާ ކުޅުމުގެ ސަބަބުން އަހަރެންނަށް ހާއްސަ މަގާމެއް ލިބުމަކީ ބޯނަހެއް” ކޮވިޑް-19 ގެ ސަބަބުން ހުއްޓާލި ފްރެންޗް ލީގުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމް ހޯދި އެމްބާޕޭ ބުންޏެވެ.

ޅަ އުމުރުގައި ގިނަ ކާމިޔާބީތަކެއް ހޯދާފައިވާއިރު އެމްބާޕޭ އަށް މިވަގުތު އެންމެ މުހިއްމީ ޕީއެސްޖީއާ އެކު ޔޫއެފާ ޗެމްޕިއަންސް ލީގު ކާމިޔާބު ކުރުމެވެ. މިދިޔަ އަހަރުތަކުގައި ޕީއެސްޖީއާ އެކު އެމްބާޕޭ އަށް ޗެމްޕިއަންސް ލީގުގެ ތައްޓާ ގާތަށް ދެވިފައެއްނުވެ އެވެ. އެހެންނަމަވެސް މި ސީޒަނުގެ ޗެމްޕިއަންސް ލީގުގެ ކުއާޓާ ފައިނަލަށް އެޓީމު މިހާރު ވަނީ ދަތުރުކޮށްފަ އެވެ.

“ޕީއެސްޖީއާ އެކު ފުރަތަމަ ފަހަރަށް ޔޫރަޕްގެ ތައްޓެއް ހޯދުމަކީ އަހަރެންގެ އަމާޒެއް. އެކަން ވާނީ ވަރަށް ހާއްސަ ކާމިޔާބީއަކަށް” އެމްބާޕޭ ބުންޏެވެ.