އުމުރުން 16 އަހަރުގައި ޕެރޫގެ އުއްމީދީ ޑިފެންޑަރު ސިޓީ އަށް

އިނގިރޭސި ކްލަބް މެންޗެސްޓަރ ސިޓީ އިން ޕެރޫގެ އުމުރުން 16 އަހަރުގެ އުއްމީދީ ޑިފެންޑަރެއްގެ ސޮއި ހޯދައިފި އެވެ. ޕެރޫގެ އެންމެ މަތީ ފަންތީގެ ލީގުގައި ވާދަކުރާ އަލިއަންޒާ ލީމާ އަށް މިހާރު ކުޅެމުން އަންނަ ލުއިވާތު އަގުއިލާގެ ސޮއި ސިޓީން ހޯދާފައިވަނީ އިއްޔެ އެވެ.

ޒުވާން ޑިފެންޑަރު ސިޓީއާ ގުޅުނު ނަމަވެސް 18 އަހަރު ވަންދެން ލޯނު އުސޫލުން ކުޅޭނީ މިހާރުވެސް ކުޅެމުން އަންނަ ޕެރޫގެ ކްލަބަށެވެ. އަގުއިލާއަށް 18 އަހަރު ވާނީ 2021 މެއި މަހުގެ ފަސް ވަނަ ދުވަހު އެވެ. އިނގިރޭސި ފުޓްބޯޅައިގެ ގަވާއިދު ބުނާގޮތުން 18 އަހަރުން ދަށުގެ ކުޅުންތެރިންނަށް ވޯކް ޕާމިޓެއް ނުލިބޭނެއެވެ. އެހެންނަމަވެސް އާއިލާއާއެކު އިނގިރޭސިވިލާތަށް ބަދަލުވެ ޔޫތު އެކެޑަމީތަކުން ސީނިއާ ޓީމުގައި ކުޅުމުގެ ފުރުސަތު ލިބޭނެއެވެ. އެކަމަކު ސިޓީން ނިންމާފައިވަނީ ކުޅުންތެރިޔާއަށް އިތުރު ތަޖުރިބާ ދިނުމުގެ ގޮތުން ލޯނު އުސޫލުން 18 އަހަރުން ވަންދެން މިހާރު ކުޅޭ ކްލަބުގައި ބެހެއްޓުމަށެވެ.

Advertisement

އަގުއިލާ ސިޓީއާ ގުޅުމަށް އެއްބަސްވުމުން އޭނާ މިހާރު ކުޅޭ ކްލަބް އަލިއަންޒާ އިން ބުނެފައިވަނީ އެއީ ޕެރޫ އިން ޔޫރަޕްގެ ފުޓްބޯޅައަށް ދާން ނިންމުނު އެންމެ މުހިއްމު ޓްރާންސްފާ ކަމަށެވެ. ސިޓީއާ ގުޅުމަށް ފަހު އަގުއިލާ ބުނެފައިވަނީ އަމާޒަކީ ސިޓީގެ ފުރަތަމަ ޓީމުގައި މޮޅު ކުޅުންތެރިއަކަށް ވުން ކަމަށެވެ.

އަގުއިލާއަކީ ޕެރޫގެ 17 އަހަރުން ދަށުގެ ގައުމީ ފުޓްބޯޅަ ޓީމުގައި ހިމެނޭ ޑިފެންޑަރެކެވެ. ކްލަބް ލެވެލްގައި އަގުއިލާ މިދިޔަ އަހަރު ކުޅެން ފަށައި މިހާތަނަށް ވަނީ އަލިއަންޒާ އަށް ހަތަރު މެޗު ކުޅެފަ އެވެ. އޭނާ ވަނީ މިދިޔަ އަހަރުގެ ކުރީކޮޅު އޮތް 17 އަހަރުން ދަށުގެ ސައުތު އެމެރިކަން ޗެމްޕިއަންޝިޕްގައި ވެސް ގައުމީ ޓީމަށް ކުޅެފަ އެވެ. ޒުވާން ގައުމީ ޓީމަށް އޭނާ މިހާތަނަށް ނުވަ މެޗު ވަނީ ކުޅެދީފަ އެވެ.

Advertisement