ޒަމާންތަކަކަށް ފަހު ލާޒިއޯ އިޓާލިއަން ލީގުގެ އެއް ވަނަ އަށް

ގާތްގަނޑަކަށް 10 އަހަރުތެރޭ ފުރަތަމަ ފަހަރަށް އިޓާލިއަން ލީގުގެ އެއް ވަނަ މަގާމަށް ލާޒިއޯ އަރައިފި އެވެ. ލާޒިއޯ އެއް ވަނަ މަގާމަށް އެރީ ރޭ އަމިއްލަ ދަނޑުގައި ކުޅުނު ލީގު މެޗުގައި 2-0 އިން ބޮލޯނިއާ ބަލިކޮށްގެންނެވެ.

ލާޒިއޯ އަށް 26 މެޗުން 62 ޕޮއިންޓް ލިބިފައިވާއިރު ދެ ވަނައިގައި އޮތީ 25 މެޗުން 60 ޕޮއިންޓް ލިބިފައިވާ ޔުވެންޓަސް އެވެ. 54 ޕޮއިންޓާއެކު ތިން ވަނައިގައި އޮތް އިންޓަ މިލާނުން ކުޅެފައިވަނީ 24 މެޗެވެ. އިޓަލީގައި ކޮރޯނާވައިރަސް ހަލުވިކަމާއެކު ފެތުރޭތީ ރޭ ޔުވެންޓަސް ދަނޑުގައި އިންޓައާ ދެކޮޅަށް ކުޅެން އޮތް މެޗު ވަނީ ފަސްކޮށްފަ އެވެ.

Advertisement

މީގެ ކުރިން އިޓާލިއަން ލީގުގެ އެއް ވަނަ މަގާމަށް ލާޒިއޯ އެރީ 11-2010 ވަނަ ސީޒަނުގައި ކުޅުނު ފުރަތަމަ 10 މެޗަށް ފަހު އެވެ. އެކަމަކު ލީގުގެ ދެ ވަނަ ބުރުގައި އެންމެ ފަހުން ކުރީގައި އޮތް 2000-1999 ވަނަ ސީޒަނުގައި އެޓީމުން ވަނީ އިޓާލިއަން ލީގު ކާމިޔާބުކޮށްފަ އެވެ.

ރޭގެ މެޗުގައި ލާޒިއޯ އަށް ލީޑު ނަގައިދިން ގޯލު 18 ވަނަ މިނެޓުގައި ޖެހީ ޗީރޯ އިމޮބިލޭ ދިން ޕާހަކުން ލުއިސް އަލްބާޓޯ އެވެ. އެޓީމުގެ ދެ ވަނަ ގޯލު އޭގެ ދެ މިނެޓު ފަހުން ޖެހީ ޖޯކިން ކޮރެއާ އެވެ. މެޗުގައި ބޮލޯނިއާ އިން ލާޒިއޯގެ ގޯލަށް ވައްދާލި ދެ ބޯޅައެއް ވީޑިއޯ އެސިސްޓެންޓް ރެފްރީ (ވީއޭއާރު) ގެ އެހީގައި ވަނީ ކެންސަލްކޮށްފަ އެވެ. ގޯލަށް ވައްދާލި ފުރަތަމަ ބޯޅަ ބޮލޯނިއާގެ ކުޅުންތެރިޔާގެ އަތުގައި ޖެހުނުކަމަށް ނިންމިއިރު ފަހުން ޖެހި ގޯލު ގަބޫލުނުކުރީ އެވަގުތު ބޮލޯނިއާގެ ކުޅުންތެރިޔާ އޮފްސައިޑުގައި ހުރުމުންނެވެ.

ލާޒިއޯ ލީގުގައި ދެން ކުޅޭ މެޗުގައި އަންނަ ހޮނިހިރު ދުވަހު ނުކުންނާނީ ޔޫއެފާ ޗެމްޕިއަންސް ލީގުގައި މޮޅު ކުޅުމެއް ދައްކަމުން އަންނަ އެޓަލާންޓާއާ ދެކޮޅަށެވެ. ދެ ވަނައިގައި އޮތް ޔުވެންޓަސް އިން ލީގުގައި އެންމެ އަވަހަށް މެޗެއް ކުޅޭނީ އަންނަ އާދީއްތަ ދުވަހު ބޮލޯނިއާއާ އެވެ. އެހެންވެ އާދީއްތަ ދުވަހު ކުޅޭ ޔުވެންޓަސް މެޗުގެ ކުރިން ހޮނިހިރު ދުވަހު އެޓަލާންޓާ ބަލިކޮށްގެން ލާޒިއޯ އަށް ލީގުގެ އެއް ވަނައިގައި ފަސް ޕޮއިންޓުގެ ލީޑެއް ނެގޭނެ އެވެ.

ރޭގެ މެޗުގައި ލާޒިއޯ ސަޕޯޓަރުން ވަނީ ބޮލޯނިއާގެ ކޯޗު ސިނީސާ މިހަލޮވިޗަށް ހޫނު މަރުހަބާއެއް ކިޔައިފަ އެވެ. މިހަލޮވިޗަކީ ވަނީ 1998 އިން 2004 އާ ހަމައަށް ލާޒިއޯ އަށް ކުޅެފަ އެވެ.

އިޓާލިއަން ލީގުގެ މިދިޔަ 10 ވަރަކަށް އަހަރު ޑޮމިނޭޓްކުރީ ޔުވެންޓަސް އިންނެވެ. މި ސީޒަނުގައި ޔުވެންޓަސްއާ އެންމެ ގާތުން ލީގަށް ވާދަކުރާނެ ޓީމެއް ގޮތުގައި ބެލެވުނީ އިންޓަ އެވެ. އެކަމަކު މިހާރު ލާޒިއޯ އިން ދައްކަމުން އަންނަ ކުޅުމާއެކު އެޓީމު ވެސް އަންނަނީ ޔުވެންޓަސް އަށް ވަރުގަދަ ސިގްނަލެއް ދެމުންނެވެ. ޔުވެންޓަސް ނޫން ޓީމަކުން އެންމެ ފަހުން އިޓާލިއަން ލީގު ކާމިޔާބުކުރީ 11-2010 ވަނަ ސީޒަނުގައި އޭސީ މިލާނެވެ.

Advertisement