ސައުތު އޭޝިއަން ގޭމްސް / ފުޓްބޯޅަ: އަންހެން ޓީމު އިންޑިއާ އަތުން ބަލިވެއްޖެ

13 ވަނަ ސައުތު އޭޝިއަން ގޭމްސްގައި ރާއްޖޭން ވާދަކުރާ ގައުމީ އަންހެން ފުޓްބޯޅަ ޓީމު ކުޅުނު ފުރަތަމަ މެޗުން ބަލިވެއްޖެ އެވެ. ނޭޕާލުގެ ޕޮކަރާ ސިޓީގެ ޕޮކަރާ ސްޓޭޑިއަމްގައި މިއަދު މެންދުރު ފަހު އިންޑިއާއާ ދެކޮޅަށް ކުޅުނު މެޗުން އަންހެން ޓީމު ބަލިވީ 5-0 އިންނެވެ.

މިއަދުގެ މެޗުގެ ފުރަތަމަ ހާފުގެ ކުރީކޮޅު އިންޑިއާއިން ލީޑު ނެގިއިރު މި ހާފު ނިމުމުގެ ކުރިން އެޓީމުން ވަނީ ތިން ގޯލުގެ ލީޑެއް ނަގައިފަ އެވެ. އަނެއް ދެ ގޯލު އިންޑިއާއިން ޖެހީ ދެ ވަނަ ހާފުގަ އެވެ.

މިފަހަރުގެ މުބާރާތުގެ އަންހެން ފުޓްބޯޅަ އިވެންޓުގައި ބައިވެރިވީ ރާއްޖެ އާއި މުބާރާތް ބާއްވާ ނޭޕާލް އަދި އިންޑިއާގެ އިތުރުން ސްރީ ލަންކާ އެވެ. އަންހެން ފުޓްބޯޅަ އިވެންޓް މިއަދު ފެށިއިރު ފައިނަލް މެޗު ކުޅޭނީ ޑިސެމްބަރު ނުވަ ވަނަ ދުވަހު އެވެ. ހަތަރު ގައުމަކުން ވާދަކުރާތީ މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން އެއް ބުރު ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ގައުމު ފައިނަލަށް ދަތުރުކުރާ ގޮތަށެވެ.

މުބާރާތުގެ ދެ ވަނަ މެޗުގައި އަންނަ ބުރާސްފަތި ދުވަހު ރާއްޖޭގެ އަންހެން ޓީމު ނޭޕާލާ ދެކޮޅަށް ނުކުންނައިރު ލީގު ބުރުގެ ފަހު މެޗުގައި ހޮނިހިރު ދުވަހު ވާދަކުރާނީ ސްރީ ލަންކާއާ އެވެ. 2016 ވަނަ އަހަރު އިންޑިއާގައި އޮތް ސައުތު އޭޝިއަން ގޭމްސްގެ އަންހެން ފުޓްބޯޅަ އިވެންޓުގެ ޗެމްޕިއަންކަން އިންޑިއާ ހޯދިއިރު ރަނަރަޕް ޓީމަކީ ނޭޕާލެވެ. އެފަހަރު މުބާރާތުގެ ތިން ވަނަ ހޯދި ބަންގްލަދޭޝްގެ އަންހެން ޓީމު މިފަހަރު ވާދައެއްނުކުރެ އެވެ. އަނެއްކޮޅުން ފަހަކަށް އައިސް އަންހެން ފުޓްބޯޅަ މުބާރާތްތަކުގައި ބަރާބަރަށް ވާދަކުރަމުން އަންނަ ބޫޓާންގެ އަންހެން ޓީމު ވެސް މިފަހަރުގެ މުބާރާތުގައި ވާދައެއްނުކުރެ އެވެ.

ރާއްޖޭގެ އަންހެން ޓީމު އެންމެ ފަހުން ވާދަކުރި ބައިނަލްއަގްވާމީ މުބާރާތަކީ މިދިޔަ މާޗް މަހު ނޭޕާލުގެ ބިރާޓްނާގާގައި ކުޅުނު ސާފް ޗެމްޕިއަންޝިޕެވެ. އެ މުބާރާތުގައި އިންޑިއާ އާއި ލަންކާއާ ވާދަކޮށް ބަލިވެ ރާއްޖެ ވަނީ ގްރޫޕް ސްޓޭޖުން ކަޓައިފަ އެވެ. ފުރަތަމަ މެޗުގައި އިންޑިއާ އަތުން 6-0 އިން ބަލިވިއިރު ދެ ވަނަ މެޗުގައި ލަންކާ އަތުން ބަލިވީ 2-0 އިންނެވެ. ބައިނަލްއަގްވާމީ ފުޓްބޯޅައިގައި އަންހެން ޓީމަށް ލިބުނު އެންމެ ބޮޑު ކާމިޔާބީއަކީ 2016 ވަނަ އަހަރު އިންޑިއާގައި އޮތް ސާފް ޗެމްޕިއަންޝިޕްގެ ސެމީ ފައިނަލަށް ދަތުރުކުރެވުމެވެ.

ސާފް ޗެމްޕިއަންޝިޕްގައި  އަންހެން ޓީމު ވާދަކުރިއިރު ކޯޗަކީ މުހައްމަދު އާތިފް (އާތީ) އެވެ. އެކަމަކު މުބާރާތަށް ފަހު އަންހެން ފުޓްބޯޅަ ޓީމު ދޫކޮށް އާތީ ހަވާލުވީ ޓީސީ ސްޕޯޓްސް ކްލަބާ އެވެ. މިފަހަރުގެ ގޭމްސްގައި އަންހެން ޓީމަށް އިރުޝާދު ދެނީ ތަޖުރިބާކާރު ކޯޗު އަހުމަދު ނާޝިދު (ނާދު) އެވެ.

މިއަދުގެ މެޗަށް ނުކުތް ރާއްޖޭގެ ފުރަތަމަ އެގާރަ:

އައިމިނަތު ލީޒާ (ގޯލްކީޕަރު)، ފާތިމަތު ތީބާ، ޝަހުލާ ތައުފީގް، މަރްޔަމް ރިފާ، އައިޝަތު ފިރުޝާ، އައިމިނަތު ޝާމިލާ، ފާތިމަތު ސާލިޔާ (ކެޕްޓަން)، އައިޝަތު މާހިން، މައީޝާ އަބްދުލްހަންނާން، އައިޝަތު ސަމާ، ހައްވާ ހަނީފާ