ސައުތު އޭޝިއަން ގޭމްސް / ފިރިހެން ފުޓްބޯޅަ: ރާއްޖެ އާއި ލަންކާ ވީ ހަމަހަމަ

13 ވަނަ ސައުތު އޭޝިއަން ގޭމްސްގެ ފުޓްބޯޅަ އިވެންޓުގެ ފުރަތަމަ މެޗުގައި މިއަދު ރާއްޖޭގެ 23 އަހަރުން ދަށުގެ ޓީމު ސްރީ ލަންކާގެ 23 އަހަރުން ދަށުގެ ޓީމާ ދެކޮޅަށް ކުޅުނު މެޗު 0-0 އިން އެއްވަރުވެއްޖެ އެވެ. ނޭޕާލުގެ ކަތުމަންޑޫގެ ދަސާރާތު ސްޓޭޑިއަމްގައި މިއަދު ހަވީރު ކުޅުނު މެޗުގައި ރާއްޖޭގެ ޓީމަށް ވަނީ ގޯލު ޖަހާނެ ގިނަ ފުރުސަތުތަކެއް ލިބި ބޭކާރުވެފަ އެވެ.

Advertisement

މިއީ ލަންކާއާ ދެކޮޅަށް ކުޅޭ ރާއްޖޭގެ ޓީމު ޖެހިޖެހިގެން އެއްވަރުވި ދެ ވަނަ މެޗެވެ. މިދިޔަ އަހަރު ބަންގްލަދޭޝްގައި އޮތް ސާފް ސުޒުކީ ކަޕް ފުޓްބޯޅަ މުބާރާތުގައި ވެސް ލަންކާގެ ސީނިއާ ޓީމާ ދެކޮޅަށް ރާއްޖޭގެ ސީނިއާ ޓީމު ކުޅުނު މެޗު ނިމުނީ ގޯލެއް ނުޖެހި އެއްވަރުވެގެންނެވެ.

މިއަދުގެ މެޗުގައި ފޭދޫ އިއްބެ ބޯޅަ ފޮނުވާލަނީ. – ފޮޓޯ: މޯލްޑިވްސް އޮލިމްޕިކް ކޮމިޓީ / އަބްދުﷲ އަބީދު

މިއަދުގެ މެޗުގެ ފުރަތަމަ އެގާރައިގައި ކޯޗު ޕީޓަ ސެގާޓް ހިމެނީ ވަރުގަދަ ޓީމެވެ. ސީނިއާ ތިން ކުޅުންތެރިން ކަމަށްވާ އަކްރަމް އަބްދުލްގަނީ (އަކޫ) އާއި އިބްރާހީމް މަހުދީ ހުސައިން (ފޭދޫ އިއްބެ) އަދި ހަމްޒާ މުހައްމަދު (ހަމްޕު) ފުރަތަމަ އެގާރައިގައި ހިމަނައިގެން ކުޅުނުއިރު ސީނިއާ ގައުމީ ޓީމުގައި ހިމެނޭ 23 އަހަރުން ދަށުގެ ގިނަ ކުޅުންތެރިންތަކެއް ވެސް ވަނީ ޓީމުގައި ހިމަނައިފަ އެވެ. ޓީމުގެ ގޯލްކީޕަރަކަށް މާޒިޔާ އާއި ގައުމީ ޓީމުގައި ހިމެނޭ ހުސައިން ޝަރީފް ހުރިއިރު ފަހަތުގައި އަކްރަމްއާ އެކު ކުޅުނީ ސީނީއާ ޓީމުގައި ހިމެނޭ ހުސައިން ސިފާއު ޔޫސުފް (ކުރޯ) އާއި ހައިޝަމް ހަސަންގެ އިތުރުން ޓީސީގެ ޒުވާން މިޑްފީލްޑަރު މުހައްމަދު ސާދު ނިޒާރު އެވެ. މެދުތެރޭގައި ހަމްޕުއާ އެކު ސީނިއާ ޓީމުގެ އިބްރާހީމް އައިސަމް ކުޅުނުއިރު އެޓޭކުގައި ފޭދޫ އިއްބެއާ އެކު ކުޅުނީ ނާއިޒް ހަސަން (ދާދު) އާއި ހަސަން ރާއިފް (ހަންނަ) އަދި އަބްދުﷲ ޔާމީން (ޔާން) އެވެ. މި ކުޅުންތެރިންގެ ތެރެއިން ހަންނަ ނޫން ދެން ތިބީ ސީނިއާ ޓީމުގެ ކުޅުންތެރިންނެވެ.

ހަމްޕު ބޯޅަ ހިފައިގެން ދާއިރު ލަންކާ ކުޅުންތެރިއަކު ހުރަސް ކުރަނީ. – ފޮޓޯ: މޯލްޑިވްސް އޮލިމްޕިކް ކޮމިޓީ / އަބްދުﷲ އަބީދު

މެޗު ފަށައިގެން ލަންކާއިން ފަހަތަށް ޖެހިގެން ކުޅުނުއިރު ރާއްޖޭގެ ޓީމުން ވަނީ ފުރަތަމަ ހާފުގައި ވެސް ގޯލު ޖަހާނެ ފުރުސަތު ތަނަވަސްކޮށްފަ އެވެ. ފުރަތަމަ ހާފުގައި ލިބުނު ފުރުސަތުތަކުގެ ބޭނުން ނުހިފުނުއިރު ދެ ވަނަ ހާފު ރާއްޖޭގެ ޓީމުން ފެށީ ޔާންގެ ބަދަލުގައި ރިހާމް އަބްދުލްގަނީ (ބޮބީ) ޓީމުގައި ހިމަނައިގެންނެވެ. މި ހާފުގެ ކުރީކޮޅު ފޭދޫ އިއްބެއަށް ދާދު ދިން ބޯޅައެއް ކޮންޓްރޯލް ނުކުރެވުމުން ބޭނުމެއް ނުހިފުނެވެ. އޭގެ ފަހުން ހަމްޕު ފޮނުވާލި ބޯޅަ ދިޔައީ ތިރިން ބޭރަށެވެ. ހަމްޕުގެ ހަމަލާއަށް ފަހު ފޭދޫ އިއްބެ ފޮނުވާލި ހިލޭ ޖެހުމަށް ގޯލުގެ ހުރަސް ދަނޑިއަށް ވަނީ އަމާޒުވެފަ އެވެ. އަދި ކޯނަރަކުން އުފެއްދި ހަމަލާއެއްގައި ވެސް ފޭދޫ އިއްބެއަށް ލިބުނު ބޯޅަ ފޮނުވާލުމުން ގޯލާ އަމާޒެއްނުވި އެވެ. މެޗުގެ ފަހުކޮޅު ހަމްޕުއަށް އޭރިޔާ ބޭރުން ކުރި ނުރައްކާތެރި ފައުލަކާއި ގުޅިގެން ބަދަލު ކުޅުންތެރިއެއްގެ ގޮތުގައި ކުޅެން ނުކުތް ލަންކާ ޓީމުގެ ސުންދަރާރާޖް ނިރޭޝް އަށް ރެފްރީ ވަނީ ރަތްކާޑު ދައްކައިފަ އެވެ. އެއް ކުޅުންތެރިއަކު މަދުކޮށް މެޗުގެ ފަހު 10 މިނެޓު ލަންކާއިން ކުޅުނު ނަމަވެސް ރާއްޖޭގެ ޓީމަށް އެޓީމުގެ ގޯލު ފޫއަޅުވާލެވޭ ގޮތެއްނުވި އެވެ. ލަންކާއަށް ޕޮއިންޓެއް ކަށަވަރުކޮށްދިނުމުގައި ރާއްޖޭގެ ކްލަބް އީގަލްސްއަށް ކުޅޭ އެގައުމުގެ ގޯލްކީޕަރު ސުޖަން ޕެރޭރާ ވަނީ މޮޅު ކުޅުމެއް ދައްކައިފަ އެވެ.

މިފަހަރުގެ ފުޓްބޯޅަ އިވެންޓުގެ ކުޅުން މިއަދު ފެށީ ގައުމުތަކުން ޝެޑިއުލާމެދު ޝަކުވާ ކޮށްފައިވަނިކޮށެވެ. މުބާރާތުގައި ވާދަކުރަން އޮތް އިންޑިއާ ވަކިވުމުން ނޭޕާލުން ވަނީ ފަސް ގައުމުގެ މެދުގައި ލީގު ބުރެއް ކުޅުމަށް ފަހު އެންމެ ކުރި ހޯދާ ދެ ގައުމު ފައިނަލަށް ދާ ގޮތަށް ޝެޑިއުލް ބަދަލުކޮށްފަ އެވެ. މި ބަދަލާއެކު މިއަދު ކުޅުނު ފުޓްބޯޅަ އިވެންޓުގެ ފުރަތަމަ މެޗުގައި ބޫޓާނުން ވަނީ 1-0 އިން ބަންގްލަދޭޝް ބަލިކޮށްފަ އެވެ.

ފިރިހެން ފުޓްބޯޅަ އިވެންޓުގައި މާދަމާ ވެސް ދެ މެޗު ކުޅޭނެ އެވެ. ފުރަތަމަ މެޗުގައި ރާއްޖެ ގަޑިން 12:15 ގައި ނޭޕާލާ ބޫޓާން ވާދަކުރާއިރު ފަހު މެޗުގައި ރާއްޖެ ނުކުންނާނީ ބަންގްލަދޭޝްއާ ދެކޮޅަށެވެ. މި މެޗު ފަށާނީ ރާއްޖެ ގަޑިން ހަވީރު 4:15 ގަ އެވެ.

Advertisement