ޔުނައިޓެޑަށް ދިމާވީ ތަޖުރިބާގެ މައްސަލަ: ސޯލްޝެއާ

އިނގިރޭސި ޕްރިމިއާ ލީގުގައި ރޭ ޝެފީލްޑް ޔުނައިޓެޑާ ދެކޮޅަށް ކުޅުނު މެޗުގައި ފަހަތުން އަރައި ތިން ގޯލު ޖަހައި ލީޑު ނަގާފައިވަނިކޮށް ފަހު ވަގުތު އެއްވަރުވީ ކުޅުންތެރިންގެ ތަޖުރިބާ މަދުވުމުން ކަމަށް މެންޗެސްޓަރ ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނެފި އެވެ. ޕްރިމިއާ ލީގަށް މި ސީޒަނުގައި އަލަށް ޕްރޮމޯޓްވެ މޮޅު ކުޅުމެއް ދައްކަމުން އަންނަ ޝެފީލްޑްގެ ދަނޑުގައި ރޭ ކުޅުނު މެޗު ނިމުނީ 3-3 އިން އެއްވަރުވެގެންނެވެ.

މެޗުން އެއްވަރުވުން ލީގު ތާވަލުގައި ޝެފީލްޑްގެ ފަހަތަށް ޖައްސާލައި ފަސް ވަނަ އަށް އެރުމުގެ ފުރުސަތު ޔުނައިޓެޑަށް ވަނީ ގެއްލިފަ އެވެ. 13 މެޗުން ލިބުނު 17 ޕޮއިންޓާ އެކު ޔުނައިޓެޑް ލީގުގެ ނުވަ ވަނައިގައި އޮތްއިރު 13 މެޗުން ލިބުނު 18 ޕޮއިންޓާ އެކު ޝެފީލްޑް އޮތީ ލީގުގެ ހަ ވަނައިގަ އެވެ.

Advertisement

ޔުނައިޓެޑްގެ ލޯނު އެއްބަސްވުމެއްގެ ދަށުން ޝެފީލްޑަށް ކުޅެމުން އަންނަ ޑީން ހެންޑަސަންގެ ބަދަލުގައި ރޭ އެޓީމުގެ ގޯލު ބެލެހެއްޓީ ސިމޮމް މޯ އެވެ. ރޭގެ މެޗު ފަށައިގެން ފުރަތަމަ ހާފުގައި ޝެފީލްޑުން ވަނީ މޮޅު ކުޅުމެއް ދައްކައި ޔުނައިޓެޑްގެ ޑިފެންސަށް ބާރުބޮޑު ކޮށްފަ އެވެ. އެޓީމުން އުފެއްދި ނުރައްކާތެރި ހަމަލާތަކެއް ޔުނައިޓެޑްގެ ގޯލްކީޕަރު ޑޭވިޑް ޑެހެއާ ވަނީ މަތަކޮށްފަ އެވެ. ޝެފީލްޑުން މެޗުގައި ލީޑު ނެގީ ފުރަތަމަ ހާފުގައި ޖޯން ފްލެކް ޖެހި ގޯލުންނެވެ. ދެ ވަނަ ހާފުގެ ކުޅުން ފެށިގެން ޝެފީލްޑަށް ލީޑު ފުޅާކޮށްދިނީ ލީސް މޫސޭ އެވެ. ޔުނައިޓެޑުން މެޗުގެ ނަތީޖާ އަނބުރާލީ މެޗުގެ ފަހުކޮޅު ގާތްގާތުގައި ޖެހި ގޯލުތަކުންނެވެ. އެޓީމުގެ ފުރަތަމަ ގޯލު 72 ވަނަ މިނެޓުގައި ބްރެންޑަން ވިލިއަމްސް ޖެހިއިރު ދެ ވަނަ ގޯލު އޭގެ ފަސް މިނެޓު ފަހުން ކާމިޔާބުކޮށްދިނީ މޭސަން ގްރީންވުޑެވެ. ޔުނައިޓެޑުން މެޗުގައި ލީޑު ނެގީ 79 ވަނަ މިނެޓުގައި މާކަސް ރަޝްފާޑް ޖަހައިދިން ގޯލުންނެވެ. ޝެފީލްޑުން މެޗުގައި ޕޮއިންޓެއް ހޯދީ އިތުރު ވަގުތުގައި އޮލިވާ މެކްބާނީ ޖެހި ގޯލުންނެވެ.

ރޭގެ މެޗުގައި ޔުނައިޓެޑަށް ގޯލު ޖަހައިދިން ތިން ކުޅުންތެރިންނަކީ ވެސް އެޓީމުގެ އެކެޑަމީ އިން ސީނިއާ ޓީމުން ޖާގަ ހޯދި ތިން ކުޅުންތެރިންނެވެ. އެއީ 19 އަހަރުގެ ވިލިއަމްސް އާއި 18 އަހަރުގެ ގްރީންވުޑް އަދި 22 އަހަރުގެ ރަޝްފާޑް އެވެ.

“ކުޅުންތެރިން މެޗުން މޮޅުވާން ބޭނުންވި. އެކަމަކު ބައެއްފަހަރު ޒުވާން ކުޅުންތެރިންނަށް މިކަހަލަ ޗެލެންޖިން މެޗުތަކުގައި މޮޅުވާންވީ ގޮތް އެންމެ ރަނގަޅަށް ނޭނގިދާނެ. ވަރަށް މުހިއްމު ފިލާވަޅުތަކެއް ދަސްވެއްޖެ މި މެޗުން. އެކަމަކު ދެ ގޯލުގެ ފަހަތުގައި އޮތް އަހަރެމެންގެ ޓީމުން ދެއްކި ހިތްވަރު ފާހަގަކުރަންޖެހޭ” މެޗަށް ފަހު ސޯލްޝެއާ ބުންޏެވެ.

Advertisement