ހުރިހާ މެޗަކުން މޮޅުވެ 12 އަހަރުން ދަށުގެ ޔޫތު ލީގު މާޒިޔާ އަށް

އެފްއޭއެމުން ކުރިއަށްގެންދިޔަ 12 އަހަރުން ދަށުގެ ދިރާގު ޔޫތު ލީގުގެ ޗެމްޕިއަންކަން ސަތޭކަ އިންސައްތަ ރެކޯޑާއެކު މާޒިޔާ އިން ހޯދައިފި އެވެ. މާޒިޔާ ޗެމްޕިއަންކަން ކަށަވަރުކުރީ ލީގު ބުރުގެ ފަހު މެޗުގައި މިއަދު ހަވީރު 4-1 އިން މޯލްޑިވްސް ސޮކަ މޭޓްސް ބަލިކޮށްގެންނެވެ.

ފުޓްބޯޅަ އެސޯސިއޭޝަނުން އިންތިޒާމުކޮށްގެން މިދިޔަ އަހަރު ފެށި ޔޫތު ކުރިއަށް ގެންދިޔައީ ހަމައެކަނި 13 އަހަރުން ދަށުގެ މުބާރާތެވެ. އެކަމަކު މި އަހަރު ކުރިއަށް ގެންދިޔަ 12 އަހަރުން ދަށުގެ ލީގާއި 14 އަހަރުން ދަށުގެ ލީގު ޗެމްޕިއަންކަން ވެސް ހޯދީ މާޒިޔާއިންނެވެ. މި ދެ ލީގުގެ ޗެމްޕިއަންކަން ވެސް މާޒިޔާއިން ހޯދީ ކުޅުނު ހުރިހާ މެޗަކުން މޮޅުވެގެންނެވެ.

https://www.facebook.com/fahuminet/photos/a.1753563491332424/2672008742821223/?type=3&permPage=1

ސޮކަ މޭޓްސް ކޮޅަށް މާޒިޔާގެ ޓީމުން މިއަދު ޖެހި ހަތަރު ގޯލުގެ ތެރެއިން އަނޫފް އަބްދުﷲ އާއި އަބްދުﷲ ރިޒާން މުހައްމަދު، ކޮންމެ ކުޅުންތެރިއަކު ވަނީ ދެ ގޯލު ޖަހައިފަ އެވެ. މެޗުގައި ސޮކަ މޭޓްސްއިން ކާމިޔާބުކުރި ގޯލަކީ މާޒިޔާގެ އަހުމަދު ހަމްދު މުހައްމަދު އަތުން ބައިކޮޅަށް ވަން ގޯލެކެވެ.

މާޒިޔާގެ ފަހަތުން 12 އަހަރުގެ ދަށުގެ ޔޫތު ލީގުގެ ޗެމްޕިއަންކަމާއި އެންމެ ގާތުން ވާދަކުރީ ޓީސީ ފުޓްބޯލް އެކަޑެމީ އެވެ. ޓީސީ ޓީމުން ވަނީ ކުޅުނު ނުވަ މެޗުގެ ތެރެއިން އަށް މެޗު ކާމިޔާބުކޮށްފަ އެވެ. މާޒިޔާއިން ކުޅުނު ނުވަ މެޗުގައި 44 ގޯލު ޖެހިއިރު ބައިކޮޅަށް ވަނީ އެންމެ ހަތަރު ގޯލެވެ. ޓީސީ ހަމައެކަނި ބަލިވީ މާޒިޔާއާ ވާދަކޮށް 3-1 އިންނެވެ. 12 އަހަރުން ދަށުގެ ޔޫތު ލީގުގައި 10 އެކަޑެމީއަކުން ވަނީ ވާދަކޮށްފަ އެވެ.

މި އުމުރުފުރައިގެ ޑްރީމް ޓީމުގައި ހިމެނުނީ ޗެމްޕިއަން މާޒިޔާގެ ހަތަރު ކުޅުންތެރިއަކާއި ޓީސީގެ ތިން ކުޅުންތެރިންގެ އިތުރުން ތިން ވަނަ ހޯދި ހުޅުމާލެ ސްޕޯޓްސް ސްކޫލުގެ ދެ ކުޅުންތެރިންނެވެ. މާޒިޔާއިން ޑްރީމް ޓީމުގައި ހިމެނުނީ އަބްދުﷲ ރިޒާން މުހައްމަދު، ޔޫނުސް ޚަލީލް އަބްދުﷲ، ނާޝިއު އަހުމަދު ޝިހާމް އަދި ގޯލްކީޕަރު އައިދީން އަލީ ހަމީދު އެވެ. ޓީސީ ޓީމުން ހިމެނުނީ އީތަން އިބްރާހީމް ޒަކީ އާއި މުހައްމަދު އިލާން އިމްރާން އަދި އަހުމަދު ހަމްދާން އަޒްލީން އެވެ. ހުޅުމާލެ ސްޕޯޓްސް ސްކޫލުން ޑްރީމް ޓީމުގައި ހިމެނުނީ މުހައްމަދު އައިހަމް އިބްރާހީމް އަދި ހުސައިން އާއިޝް އަބްދުލް ވާހިދު އެވެ. މުބާރާތުގެ އެންމެ މޮޅު ކޯޗުގެ މަގާމް ހޯދީ މާޒިޔާއަށް ޗެމްޕިއަންކަން ހޯދައިދިން މުހައްމަދު އަރީފް އެވެ.

މިދިޔަ އަހަރު އޮތް 13 އަހަރުން ދަށުގެ ޔޫތު ލީގުގައި ނުވަ ޓީމަކުން ވާދަކުރިއިރު މި އަހަރު ކުޅުނު ދެ އުމުރުފުރައިގެ ޔޫތު ލީގުގައި 11 އެކަޑެމީއަކުން ވަނީ ވާދަކޮށްފަ އެވެ. މިދިޔަ އަހަރުގެ ޔޫތު ލީގުގެ ޗެމްޕިއަންކަން ހޯދީ އާލީ ޓަޗް ފުޓްބޯލް އެކަޑެމީގެ ޓީމެވެ.

މިއަހަރު އެންމެ ފުރަތަމަ ކުޅުނީ 14 އަހަރުން ދަށުގެ ޔޫތު ލީގެވެ. އެ ލީގުގައި މާޒިޔާގެ ފަހަތުން ދެ ވަނަ ހޯދީ ހުޅުމާލެ ސްޕޯޓްސް ސްކޫލެވެ. 14 އަހަރުން ދަށުގެ ލީގުގައި ކުޅުނު ހަތް މެޗު ވެސް މާޒިޔާގެ ޓީމު ކާމިޔާބުކުރިއިރު 31 ގޯލު ޖަހައި ބައިކޮޅަށް ވަނީ އެންމެ ގޯލެކެވެ.

https://www.facebook.com/fahuminet/photos/a.1753563491332424/2582993981722700/?type=3&permPage=1

އެފްއޭއެމްގެ ޓުވާޑްސް ފިއުޗާ ބެނާގެ ދަށުން މިދިޔަ އަހަރު ފެށި ޔޫތު ލީގަށް ބޮޑު ސަޕޯޓެއް ވަނީ ލިބިފަ އެވެ. އަދި، ޔޫތު ލީގުތަކުގައި ވާދަކޮށް ލިބޭ ތަޖުރިބާގެ އެހީގައި ރާއްޖޭން ބޭރުގައި އޮންނަ މުބާރާތްތަކުގައި ބައިވެރިވުމުގެ ފުރުސަތު ވެސް ބައެއް އެކަޑެމީތަކުން އަންނަނީ ހޯދަމުންނެވެ. ޔޫތު ލީގުގެ ކުރިން މާޒިޔާގެ 14 އަހަރުން ދަށުގެ ޓީމު ވަނީ މިދިޔަ އޮގަސްޓް މަހުގެ ކުރީކޮޅު އިންޑިއާގެ ޗެންނާއީގައި އޮތް އިންޓަނޭޝަނަލް ކަޕް އޮފް ޖޯއީ ޔޫތު ފުޓްބޯޅަ މުބާރާތުގެ ޗެމްޕިއަންކަން ފައިނަލުގައި ގަދަފަދަ ބެންގަލޫރު ބަލިކޮށް ހޯދައިފަ އެވެ. މި ކާމިޔާބީއަށް ފަހު މާޒިޔާއިން މިހާރު އަންނަނީ އަންނަ މަހުގެ ކުރީކޮޅު ތައިލެންޑުގައި އޮންނަ ޔޫތު މުބާރާތެއްގައި 15 އަހަރުން ދަށުގެ ޓީމު ބައިވެރިކުރުމުގެ މަސައްކަތް ކުރަމުންނެވެ. އެ މުބާރާތަށް ތައްޔާރުވުމުގެ ގޮތުން މާޒިޔާގެ 15 އަހަރުން ދަށުގެ ޔޫތު ޓީމު އިއްޔެ ވަނީ ބ. އޭދަފުށީގެ 15 އަހަރުން ދަށުގެ ޓީމާ ވާދަކޮށް 2-0 އިން މޮޅުވެފަ އެވެ. މި މެޗު ކުޅުނީ އޭދަފުށީގައި އޮންނަ ފެންވަރު ރަނގަޅު ޓާފް ފުޓްބޯޅަ ދަނޑުގަ އެވެ.