އަންހެން ވޮލީ ޓީމް ފައިނަލުގައި މިއަދު ނޭޕާލާ ދެކޮޅަށް ނުކުންނަނީ

އޭވީސީ ސީނިއާ ވިމެންސް ސެންޓްރަލް ޒޯން ވޮލީބޯލް ޗެމްޕިއަންޝިޕްގެ ފައިނަލުގައި ރާއްޖޭގެ އަންހެން ގައުމީ ވޮލީބޯލް ޓީމު މިއަދު ނޭޕާލާ ދެކޮޅަށް ނުކުންނާނެ އެވެ. ބަންގްލަދޭޝްގެ ވެރިރަށް ޑާކާގެ ޝަހީދު ސުރަވާރުދީ އިންޑޯ ސްޓޭޑިއަމްގައި ރާއްޖޭއާ ނޭޕާލް ވާދަކުރާ ފައިނަލް މެޗު ފަށާނީ ރާއްޖެ ގަޑިން މެންދުރުފަހު ދޭއް ޖަހާއިރު އެވެ.

ފަސް ގައުމަކުން ބައިވެރިވި މުބާރާތުގެ ފައިނަލަށް ރާއްޖޭން ދަތުރުކުރީ ކުޅުނު ހަތަރު މެޗުގެ ތެރެއިން ތިން މެޗު ކާމިޔާބުކޮށްގެންނެވެ. ފައިނަލުގެ އަނެއް ޖާގަ ނޭޕާލް ކަށަވަރުކުރީ ކުޅުނު ހަތަރު މެޗުން ވެސް މޮޅުވެ ލީގު ބުރުގެ އެއް ވަނަ ޓީމުގެ ގޮތުގަ އެވެ. ރާއްޖެ އާއި ނޭޕާލްގެ އިތުރުން މުބާރާތުގެ ލީގު ބުރުގައި ވާދަކުރީ ކިރްގިސްތާނާއި ބަންގްލަދޭޝް އަދި އަފްގާނިސްތާނެވެ.

Advertisement

މުބާރާތުގެ ފުރަތަމަ މެޗުގައި ރާއްޖޭގެ ޓީމުން ވަނީ ވާދަވެރި ކުޅުމަކަށް ފަހު ކިރްގިސްތާނުގެ މައްޗަށް 3-2 އިން ކުރި ހޯދާފަ އެވެ. މި މެޗުގެ ފުރަތަމަ ސެޓު ރާއްޖޭން 26-24 އިން ގެންގޮސްފައިވަނިކޮށް ކިރްގިސްތާނުން ވަނީ ޖެހިގެން އަދި ދެ ސެޓު 22-25 އަދި 14-25 އިން ކާމިޔާބުކޮށްފަ އެވެ. އެކަމަކު ރާއްޖޭން ވަނީ ކުޅުން އިތުރަށް ރަނގަޅުކޮށް ހަތަރު ވަނަ ސެޓާއި ނަތީޖާ ނެރެން ކުޅުނު ފަހު ސެޓު ކާމިޔާބުކޮށްފަ އެވެ. މެޗުގެ ހަތަރު ވަނަ ސެޓު 25-18 އިން ރާއްޖޭން ކާމިޔާބުކުރިއިރު ފަހު ސެޓު ގެންދިޔައީ 15-10 އިންނެވެ.

ކިރްގިސްތާން އަތުން އުނދަގުލުން ހޯދި މޮޅަށް ފަހު ރާއްޖޭގެ ޓީމުން ވަނީ ލީގު ބުރުގައި ޖެހިގެން އައި ދެ މެޗު އިތުބާރާއެކު ކުޅެ ކާމިޔާބުކޮށްފަ އެވެ. މުބާރާތް ބާއްވާ ބަންގްލަދޭޝް އާއި އަފްގާނިސްތާނާ ވާދަކޮށް ރާއްޖޭގެ ޓީމު މެޗުތައް ކާމިޔާބު ކުރީ ސީދާ ތިން ސެޓުންނެވެ. ބަންގްލަދޭޝްއާ ކުޅުނު މެޗުގެ ސެޓުތައް ރާއްޖޭގެ ޓީމުން ގެންދިޔައީ 25-16، 27-25 އަދި 25-22 އިންނެވެ. އޭގެފަހުން އަފްގާނިސްތާންގެ މައްޗަށް 25-06، 25-07 އަދި 25-08 އިން ރާއްޖޭން ކުރި ހޯދީ ބެންޗުގައި ތިބި ބައެއް ކުޅުންތެރިންނަށް ފުރުސަތު ދީގެންނެވެ. ފުރަތަމަ ތިން މެޗުން ހޯދި މޮޅާއެކު ފައިނަލުގެ ޖާގައެއް ކަށަވަރުވުމުން އިއްޔެ ކުޅުނު ލީގު ބުރުގެ ފަހު މެޗުގައި ރާއްޖޭން ނޭޕާލާ ދެކޮޅަށް ކުޅުނު މެޗުން ސީދާ ތިން ސެޓުން ވަނީ ބަލިވެފަ އެވެ. މި މެޗުގެ ސެޓުތައް ނޭޕާލުން ގެންދިޔައީ 14-25، 05-25 އަދި 13-25 އިންނެވެ.

މި އަހަރުގެ މުބާރާތަށް އެންމެ ފުރަތަމަ ރާއްޖޭން އަމާޒުހިފީ މެޑަލެއް ހޯދުމަށެވެ. އެކަމަކު އުއްމީދުކުރި ވަރަށް ވުރެ މޮޅު ކުޅުމެއް ދައްކައި ފައިނަލުގެ ޖާގައެއް ކަށަވަރުކުރުމުން ރާއްޖޭން މިހާރު އަމާޒު ހިފާފައިވަނީ ވަރުގަދަ ނޭޕާލުގެ މައްޗަށް ކުރި ހޯދައި ރަން މެޑަލް ހޯދުމަށެވެ. މިއަދުގެ މެޗުން ބަލިވިޔަސް ރާއްޖެއަށް ރިހި މެޑަލް ކަށަވަރުވާއިރު މިއީ ބައިނަލްއަގްވާމީ މުބާރާތަކުން ރާއްޖޭގެ އަންހެން ގައުމީ ވޮލީ ޓީމަށް ލިބޭނެ އެންމެ ބޮޑު ކާމިޔާބީ އެވެ.

މުބާރާތަށް ތައްޔާރުވުމުގެ ގޮތުން ކޯޗު އަހުމަދު އަދީލް (ބޭބެ) ގެ އިރުޝާދުގެ ދަށުން ރާއްޖޭގައި ކުރިއަށްގެންދިޔަ ފަރިތަކުރުންތަކުގައި ގައުމީ ފިރިހެން ވޮލީބޯލް ޓީމުގެ ކޯޗު ސާބިއާގެ މިލޮރަޑް ކިޔަޗް ވެސް ވަނީ އަންހެން ޓީމަށް އެހީތެރިކަން ފޯރުކޮށްދީފަ އެވެ. މިފަހަރުގެ އޭވީސީ މުބާރާތުގައި އަންހެން ޓީމަށް އިރުޝާދުދެނީ އެސިސްޓެންޓް ކޯޗު މުހައްމަދު ފައިސަލެވެ.

މިއަދުގެ ފައިނަލް މެޗު ޕީއެސްއެމްގެ ޔެސް އެޗްޑީ އިންނާއި ވީޓީވީ ވަގުތުން ދައްކާގޮތަށް ވަނީ ހަމަޖެހިފަ އެވެ.

ފައިނަލުގައި ވާދަކުރާ އަންހެން ވޮލީބޯލް ޓީމަށް “ފަހުމިނެޓް” ޓީމުގެ ނަމުގައި ކާމިޔާބަށް އެދެމެވެ.

Advertisement