މުއްނި ކަޕް: ގެލެކްސީ ބަލިކޮށް ޕޮލިސް ޗެމްޕިއަން ކަން ހޯދައިފި

މ. މުލަކު ޒުވާނުންނަށް އަމާޒުކޮށްގެން މުލަކުއަތޮޅު ކައުންސިލްގެ ނައިބު ރައީސް އަހުމަދު ހަސަން (މުއްނި) އެރަށުގައި ބޭއްވި މުއްނި ކަޕް ދެ ވަނަ ފުޓްސަލް މުބާރާތުގެ ޗެމްޕިއަންކަން ޕޮލިސް ޓީމު ހޯދައިފިއެވެ. ޕޮލިސް ޓީމު ޗެމްޕިއަންކަން ހޯދީ ރޭ ކުޅުނު ފޯރިގަދަ ފައިނަލް މެޗުގައި އެފްސީ ގެލެކްސީއާ ވާދަކޮށް 1-0 ކާމިޔާބު ކޮށްގެންނެވެ. 

މުލަކުގެ ޓާފް ފުޓްސަލް ދަނޑުގައި ކުޅުނު މި މެޗު ބެލުމަށް އެރަށުގެ ގިނަ އަދަދެއްގެ ސަޕޯޓަރުން ވަނީ ގޮސްފައެވެ. ފައިނަލް މެޗުގެ ޝަރަފްވެރި މެހެމާނަކީ މުބާރާތް އިންތިޒާމު ކުރި މުއްނި އެވެ. މެޗުގެ ހަމައެކަނި ގޯލު ޖެހީ ފައިނަލް މެޗުގެ މޮޅު ކުޅުންތެރިޔާގެ މަގާމް ހޯދި ޕޮލިސް ޓީމުގެ އަބްދުﷲ ޖަމީލް އެވެ. ފުރަތަމަ ހާފުގައި އެޓީމުން އުފެއްދި ހަމަލާއެއްގައި އޭރިޔާ ތެރޭގައި ހުރި ޖަމީލް ގޯލުގެ ތެރެއަށް ބޯޅަ ފޮނުވާލީ ފަސޭހަކަމާއެކު އެވެ.

ޕޮލިސް ޓީމަށް މެޗުގައި ގޯލު ޖަހާނެ އިތުރު ފުރުސަތުތައް ލިބުނު ނަމަވެސް ބޭނުންކުރެވޭ ގޮތެއް ނުވިއެވެ. އަނެއްކޮޅުން މެޗުގެ ނަތީޖާ ހަމަހަމަ ކުރަން އެފްސީ ގެލެކްސީ ޓީމުން އުފެއްދި ހަމަލާތައް ހުއްޓުވުމުގައި ޕޮލިސް ޓީމުން ވަނީ މޮޅު ކުޅުމެއް ދައްކައިފައެވެ. މުބާރާތުގެ ފައިނަލަށް އެފްސީ ގެލެކްސީ ޓީމު ދިޔައީ ގްރޫޕް ސްޓޭޖުގެ އެއް ވަނަ ހޯދައި ސެމީ ފައިނަލް މެޗުވެސް ފަސޭހަކަ ކަމާއެކު ކާމިޔާބު ކޮށްގެންނެވެ. ގްރޫޕް ސްޓޭޖުގެ ތިން ވަނަ ޓީމުގެ ގޮތުގައި ޕޮލިސް ޓީމު ސެމީ އަށް ހޮވުނުއިރު އެޓީމު ފެނުނީ ކޮންމެ މެޗަކާއެކު ކުޅުން ރަނގަޅު ކުރިތަނެވެ. 

މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނީ ގެލެކްސީ އާއި މިސްޔޫ އަދި ޕޮލިސް ޓީމުގެ ކުޅުންތެރިންނެވެ. މިސްޔޫ ޓީމުން އާދަމް ޝަހީމް އަދި އިބްރާހީމް މައިޝާން ހިމެނުނުއިރު ފައިނަލް މެޗުން ބަލިވި ގެލެކްސީ ޓީމުން ގަދަ ފަހެއްގައި ހިމެނުނީ އަހުމަދު ރައިހާން އާއި އެޓީމުގެ ގޯލްކީޕަރު އާދަމް އަހުމަދު މަނިކެވެ. ޗެމްޕިއަން ޕޮލިސް ޓީމުން ގަދަ ފަހެއްގައި ހިމެނުނީ ސުޖުއާން ހުސައިން އެވެ. މުބާރާތުގެ މޮޅު ކުޅުންތެރިޔާގެ މަގާމް ހޯދީ ޕޮލިސް ޓީމުން ޗެމްޕިއަންކަން ހޯދުމުގައި މުހިއްމު ދައުރެއް އަދާކުރި އަބްުﷲ ޖަމީލް އެވެ. މުބާރާތުގެ ފެއާޕްލޭ ޓީމަކަށް އެފްސީ ގެލެކްސީ ހޮވުނުއިރު އެންމެ މޮޅު ކޯޗަކަށް ހޮވުނީ ޕޮލިހަށް ޗެމްޕިއަންކަން ހޯދައިދިން އަލީ އިބްރާހީމް އެވެ. އެންމެ ގިނަ ގޯލް ޖެހި ކުޅުންތެރިޔާގެ މަގާމް ދެކުޅުންތެރިއަކަށް ލިބުނެއެވެ. މި މަގާމް ހޯދީ ސެމީން ބަލިވި އެމްވައިއެސް ޓީމުގެ ޒާހިދު އިބްރާހީމް އާއި އެފްސީ ގެލެކްސީ ޓީމުގެ އަހުމަދު ސައުދު އެވެ. މުބާރާތުގެ މަގާމްތަކަށް އިނާމު ހަވާލުކޮށްދެއްވީ ޝަރަފްވެރި މެހެމާން އަހުމަދު ހަސަން (މުއްނި) އެވެ. 

މިއަހަރުގެ ޗެމްޕިއަންކަން ހޯދި ޕޮލިސް ޓީމަށް ވަނީ 10،000 ރުފިޔާގެ ރަމްޒީ ޗެކް ރޭ ހަވާލުކޮށްފައެވެ. މިއީ މުއްނި ކަޕްގެ ނަމުގައި އެރަށުގައި މި މުބާރާތް ކުރިއަށް ގެންދިޔަ ދެ ވަނަ އަހަރެވެ. މިދިޔަ އަހަރުގެ އޮގްސްޓް މަހު ކުޅުނު މުބާރާތުގެ ޗެމްޕިއަންކަން ހޯދީ ފައިނަލުގައި ދި ގޯޅިއަންސް ބަލިކޮށް މިސްޔޫ ޓީމެވެ. 

މި މުބާރާތް ބޭއްވުމުގެ މަގުސަދަކީ ރަށުގެ ޒުވާނުންގެ މެދުގައި އޮންނަ ގުޅުން ހަރުދަނާކޮށް ކުޅިވަރުގެ މައިދާނުގައި ޒުވާނުންނަށް އޮތް ފުރުސަތުތައް އިތުރު ކުރުން ކަމަށް މުބާރާތް އިންތިޒާމުކުރާ ފަރާތުން މައުލޫމާތު ދެއެވެ. މީގެ އިތުރުން ރާއްޖޭގައި ފޯރިއާއެކު ކުރިއަރަމުން އަންނަ ފުޓްސަލް އިން ހުނަރުވެރި ޒުވާނުންތަކެއް އުފައްދައި ގައުމީ ލެވެލްގައި އެ ކުޅުންތެރިންގެ ހުނަރު ދައްކާލުމުގެ ފުރުސަތު ފަހިކޮށްދިނުމަކީވެސް މި މުބާރާތް ޒުވާނުންނަށް ހާއްސަ ކުރުމުގެ އެއް ސަބަބު ކަމަށް އިންތިޒާމު ކޮމިޓީން ބުނެފައިވެއެވެ.