ލިވަޕޫލާ ޗެލްސީން ނަތީޖާ ނެރުނުއިރު އާސެނަލަށް ނުތަނަވަސްކަން

އިނގިރޭސި ޕްރިމިއާ ލީގުގައި ރޭ ކުޅުނު މެޗުތައް ލިވަޕޫލާ ޗެލްސީ ކާމިޔާބުކުރިއިރު އިއްޔެ ހަވީރު ކުޅުނު މެޗުން ބަލިވެ އާސެނަލަށް ލީގުގެ ގަދަ ހަތަރަށް އެރުމަށް އުނދަގޫތަކެއް ކުރިމަތިވެއްޖެ އެވެ. އިއްޔެ ހަވީރު ރަށުން ބޭރުގައި ވެސްޓް ހޭމް ޔުނައިޓެޑާއި ވާދަކޮށް އާސެނަލް ބަލިވީ 1-0 އިންނެވެ. އޭގެފަހުން ކުޅުނު މެޗުން ރަށުން ބޭރުގައި ލިވަޕޫލުން ވަނީ 1-0 އިން ބްރައިޓަން ބަލިކޮށްފައެވެ. އަމިއްލަ ދަނޑުގައި ނިއުކާސަލްއާ ވާދަކޮށް ޗެލްސީ މޮޅުވީ 2-1 އިންނެވެ.

މި ނަތީޖާތަކާއެކު ލީގުގެ އެއް ވަނައިގައި ލިވަޕޫލް މިހާރު ވަނީ ހަތް ޕޮއިންޓުގެ ލީޑެއް ނަގައިފައެވެ. އެޓީމަށް 57 ޕޮއިންޓާއެކު އެއް ވަނަ ލިބޭއިރު ދެ ވަނައިގައި އޮތް ސިޓީ އަށް ލިބިފައިވަނީ 50 ޕޮއިންޓެވެ. އެކަމަކު މާދަމާ ރޭ އަމިއްލަ ދަނޑުގައި ވުލްވްސްއާ ކުޅޭ މެޗު ކާމިޔާބުކޮށްގެން ސިޓީ އަށް ލިވަޕޫލާ ދެމެދު އޮތް ފަރަގު ހަތަރު ޕޮއިންޓަށް ކުޑަ ކުރެވޭނެއެވެ. 48 ޕޮއިންޓާއެކު މިވަގުތު ތިން ވަނައިގައި އޮތް ޓޮޓެންހަމް ހޮޓްސްޕާސް މިރޭ ވެމްބްލީ ސްޓޭޑިއަމްގައި މެންޗެސްޓަރ ޔުނައިޓެޑް ބަލިކޮށްގެން ދެ ވަނަ ހޯދުމުގެ ފުރުސަތު އެބައޮތެވެ. ޓޮޓެންހަމްގެ ފަހަތުން ހަތަރު ވަނައިގައި އޮތީ 47 ޕޮއިންޓް ހޯދައިފައިވާ ޗެލްސީ އެވެ. ރޭގެ މެޗުން ބަލިވި އާސެނަލް 41 ޕޮއިންޓާއެކު ފަސް ވަނައިގައި އޮތް އިރު ޗެލްސީއާ އެޓީމާ ދެމެދު ހަ ޕޮއިންޓުގެ ފަރަގެއް އެބައޮތެވެ.

Advertisement

އިއްޔެ ހަވީރު ކުޅުނު މެޗުގައި އާސެނަލްގެ ފަރާތުން މާ ރަނގަޅު ކުޅުމެއް ނުފެނުއިރު ވެސްޓް ހޭމްގެ ގޯލަށް މާ ނުރައްކާތެރި ހަމަލާއެއްވެސް ފޮނުވާލެވިފައެ ނުވެއެވެ. ވެސްޓް ހޭމް އިން އިއްޔެ ވަނީ މިމަހުގެ އެއް ވަނަ ދުވަހު އެޓީމާ ގުޅުނު ސާމިރު ނަސްރީ އަށް ފުރަތަމަ އެގާރައިން ފުރުސަތު ދީފައެވެ. ފުޓްބޯޅައިން 18 މަސްދުވަހުގެ ސަސްޕެންޝަނެއްގައި ހުރުމަށްފަހު ކުރިން އާސެނަލަށް ކުޅުނު ނަސްރީ ވަނީ އިއްޔެ މެޗުގައި ރަނގަޅު ކުޅުމެއް ދައްކައިފައެވެ. އާސެނަލް ކޮޅަށް ވެސްޓް ހޭމްގެ ޑެކްލަން ރައިސް މެޗުގެ 48 ވަނަ މިނެޓުގައި ގޯލު ޖެހީވެސް ނަސްރީ ދިން ބޯޅައަކުންނެވެ. މިއީ އުމުރުން 19 އަހަރުގެ ރައިސް ވެސްޓް ހޭމް އަށް ޖަހައިދިން ފުރަތަމަ ގޯލެވެ. ރިޕަބްލިކް އޮފް އަޔަލޭންޑްގެ މިޑްފީލްޑަރ ރައިސް އަކީ މިހާރު ބޮޑެތި ބައެއް ޓީމުތަކުން ވެސް ކަޅިއަޅާ ކުޅުންތެރިއެކެވެ. އޭގެތެރޭގައި އިނގިރޭސި ކްލަބް މެންޗެސްޓަރ ސިޓީ ހިމެނެއެވެ.

ރޭ ބްރައިޓަން އަތުން ލިވަޕޫލް މޮޅުވި މެޗުގައި ހަމައެކަނި ގޯލު ޖެހީ ލިބުނު ޕެނަލްޓީ އަކުން މުހައްމަދު ސަލާހް އެވެ. ދެ ވަނަ ހާފު ފެށިގެން ފަސް ވަނަ މިނެޓުގައި މި ޕެނަލްޓީ ލިބުނީ ސަލާހް އަށް ބްރައިޓަންގެ ކުޅުންތެރިއަކު ކުރި ފައުލަކަށެވެ. މި ގޯލާއެކު ސަލާހް ވަނީ ލީގުގައި މިހާތަނަށް 14 ގޯލު ޖަހައި ހަތް ގޯލު ޖަހަން ފުރުސަތު ތަނަވަސްކޮށްދީފައެވެ. އަމިއްލަ ދަނޑުގައި ކުޅުނު ބްރައިޓަން އިންވެސް ވަނީ ރޭގެ މެޗުގައި ގޯލު ޖަހާނެ މަދު ފުރުސަތުތަކެއް ތަނަވަސްކޮށްފައެވެ. އެކަމަކު ލިވަަޕޫލުގެ ޑިފެންސް ގައި ތިބި ވާޖިލް ވެން ޑައިކް އާއި ބްރެޒިލްގެ ފަބީނިއޯ ބްރައިޓަންގެ ކުޅުންތެރިން ހިފެހެއްޓުމުގައި މޮޅު ކުޅުމެއް ދައްކައިފައެވެ.

މި ސީޒަނުގައި ދަށް ނަތީޖާތަކެއް ނެރެމުން އަންނަ ނިއުކާސަލް އަތުން ޗެލްސީން ހޯދި ހަނި މޮޅުގައި އެޓީމުގެ ގޯލުތައް ޖަހައިދިނީ ޕެޑްރޯ އާއި ވިލިއަން އެވެ. މެޗުގެ ފުރަތަމަ ގޯލު ޕެޑްރޯ ޖެހީ  ނުވަ ވަނަ މިނެޓުގައި ޑޭވިޑް ލުއިޒް ތަނަވަސްކޮށްދިން ފުރުސަތަކުންނެވެ. ފުރަތަމަ ހާފު ނިމުމުގެ ކުރިން ނިއުކާސަލް އަށް މެޗުގެ ނަތީޖާ ހަމަހަމަ ކޮށްދިނީ މެޓް ރިޗީ ދިން ބޯޅައަކުން ޑިފެންޑަރު ކްލަރަން ކްލާކް އެވެ. ޗެލްސީ މޮޅުވި ގޯލު ވިލިއަން ޖެހީ އެޑެން ހަޒާޑް ތަނަވަސްކޮށްދިން ފުރުސަތެއްގައެވެ.

ލީގުގައި މިރޭ ދެ މެޗު ކުޅޭއިރު ރޭގަނޑު 7:15 ގައި ފަށާ މެޗުގައި އެވަޓަން ނުކުންނާނީ ބޯންމައުތާއި ދެކޮޅަށެވެ. އަދި 9:30 ގައި ފަށާ މެޗުގައި ޓޮޓެންހަމާއި މެންޗެސްޓަރ ޔުނައިޓެޑް ވާދަކުރާނެ އެވެ.

Advertisement